პრემიერმინისტრის, ირაკლი ღარიბაშვილის განცხადებით, იმპორტიორებთან სამინისტროებმა უნდა დაიწყონ ლაპარაკი, რომ შემოტანილ პროდუქტებზე ფასები დარეგულირდეს. მისი თქმით, მიდგომა, რომელიც დღეს ქვეყანაში სხვადასხვა პროდუქტის შემომტანებს აქვთ, მიუღებელია.
“რამდენიმე კვირის წინ დავავალე კონკურენციის სააგენტოს სურსათის პროდუქტების ფასების შესწავლა, მაინტერესებდა რამდენად კეთილსინდისიერად მუშაობენ იმპორტიორები და რამდენად გონივრული, ასე ვიტყოდი, მარჟებით, მოგებით მუშაობენ იმპორტიორები”, – თქვა ღარიბაშვილმა.
მისი თქმით, შედეგი შემაშფოთებელი იყო, რაგდან პირველადი ანალიზით, ბრინჯის, წიწიბურის, შაქარის, მარილის, ზეთის ყიდვა მოსახელობას თითქმის 100%-იანი ფასნამატით უწევს. მან ეკონომიკის, ფინანსთა და სოფლის მეურნეობის მინისტრებს დაავალა გააკეთონ სამუშაო ჯგუფი, დაიბარონ ყველა მსხვილი იმპორტიორი, დაიწყოს საკითხის შესწავლა და მოხდეს რეაგირება.
“მე მაქსიმუმ ორ კვირაში უნდა მქონდეს მაგიდაზე სრული სურათი, შესაბამისი გამოსავლის გზებით, ეს რა თქმა უნდა, არის მიუღებელი, ამხელა მოგებით, გვახსოვს ძალიან კარგად, მუშაობდნენ წამლების იმპორტიორები”, – თქვა ღარიბაშვილმა.
ღარიბაშვილმა თქვა, რომ “არ შეიძლება ხალხის ხარჯზე ასეთი გამდიდრება”. მისი თქმით, ფასები გონივრული მარჟების ფარგლებში უნდა დარეგულირდეს.
მისივე თქმით, სამინისტროებმა უნდა დაიბარონ ნავთობის იმპორტიორებიც და ამ შემთხვევაშიც ფასის გონივრულ ზღვარზე ჩამოწევა უნდა მოხდეს. ღარიბაშვილის განცხადებით, არ შეიძლება ერთ ლიტრ ბენზინზე თითქმის ლარამდე ფასნამატი იყოს.