კლინიკა “ვივა მედში” მივიდა მესამე პრეზიდენტის ძმა, გიორგი სააკაშვილიც. ისიც ცდილობს გაარკვიოს დეტალები, გადაჰყავთ თუ არა მიხეილ სააკაშვილი რეანიმაციულ განყოფილებაში.
მან მედიასთან კიდევ ერთხელ გაიმეორა, რომ სირცხვილია, ის მდგომარეობა, რომელშიც მიხეილ სააკაშვილს ამყოფებენ.
“ემოციებზე ვარ ძალიან, ვინაიდან მეც ჯერ ბოლომდე არ ვარ გარკვეული, მაგიტომ მოვედი, რომ გავარკვიო. ჩვენ ვხედავთ, რომ დღითი დღე უარესდება და მართლა როდემდე უნდა გაგრძელდეს ეს მარაზმი, მართლა სირცხვილია, რა დღეში ამყოფებენ ადამიანს. ამიტომ, ჩვენ გავერთიანდებით, საზოგადოება და ჩვენ მიშას არ მოვაკვლევინებთ, მე ვიქნები გარანტი, ძმა მაგისი. ყოველთვის ვცდილობდი, რომ ზომიერი განცხადებები გამეკეთებინა, მაგრამ ამოვიდა უკვე ყელში ეს ყველაფერი, ვინაიდან ვხედავ, რომ ძმა მიკვდება”, – თქვა გიორგი სააკაშვილმა.
ცოტა ხნის წინ “ნაციონალური მოძრაობის” წევრმა, გიორგი ჩალაძემ განაცხადა, რომ კლინიკაში შესაბამისი მოსამზადებელი სამუშაოები მიმდინარეობს მიხეილ სააკაშვილის რეანიმაციაში გადასაყვანად. აღნიშნული ჯერ კლინიკას არ დაუდასტურებია.
მიხეილ სააკაშვილის პალატაში ამ წუთებში მისი ადვოკატი, შალვა ხაჭაპურიძე იმყოფება.