როგორც რუსული, კრიმინალურ წყაროებთან დაახლოებული და კრიმინალური პროფილით მომუშავე მედიასაშუალებები იტყობინებიან, დაახლოებით ორი საათის წინ ტრაპიზონში დაცხრილეს 64 წლის ქართველი ე.წ. კანონიერი ქურდი რევაზ ლორთქიფანიძე, იგივე “რეზო ტბილისსკი”.
იმ ე.წ. კანონიერ ქურდებს შორის, ვინც ამ დრომდე თურქეთში და კერძოდ, ტრაპიზონში იმყოფებიან, “რეზო ტბილისსკი” ერთ-ერთი ყველაზე გამოცდილი და ავტორიტეტული კრიმინალური ლიდერი იყო.
რუსული მედია ხაზს უსვამს, რომ რევაზ ლორთქიფანიძე, ბევრი მისი “კოლეგისგან” განსხვავებით, ე.წ. ქურდული ცხოვრების ძველი წესის მიმდევარი იყო, რაც იმას ნიშნავს, რომ ტიტულის მატარებელს “ბრადიაგის” ცხოვრებით უნდა ეცხოვრა, არ ჰქონოდა დიდი ქონება და არ დახარბებოდა პრივილეგიებს.
“რეზო ტბილისსკის” მკვლელობის მოტივები ამ დრომდე უცნობი რჩება.
“რეზო ტბილისსკი” “კანონიერი ქურდის” ტიტულს 1988 წლიდან ატარებს, როცა ის თბილისში, ზალიკ ლობჟანიძის დაკრძალვაზე ავთო ღარიბაშვილმა “მონათლა”. რეზო ტბილისსკის “ანგარიშზე” 12 ტიტულჩამორთმეული “ქურდია” 14 კონფლიქტის შედეგად, რაც ასევე, მის ავტორიტეტსა და გავლენაზე მიუთითებს.