საქართველოს მესამე პრეზიდენტის პალატაში გამომძიებლები შევიდნენ – სპეციალური საგამოძიებო სამსახურის თანამშრომლები “ვივა მედში” მიხეილ სააკაშვილისთვის სისხლის ნიმუშების ასაღებად მივიდნენ.
დამატებით ნიმუშებს პრეზიდენტისგან ტოქსიკოლოგიური კვლევისთვის საგამოძიებო უწყება სამხარაულის ბიუროს მოთხოვნით იღებს.
“ექსპერტიზის ეროვნული ბიურო გაეცნო დადგენილებას, მათ შორის დადგენილების კითხვებში მითითებულ შესაძლო ინტოქსიკაციის საკითხზე სხვადასხვა მეტალების თაობაზე, რომელზეც იყო გაცხადებული, ამიტომ ექსპერტიზის ეროვნულმა ბიურომ მიზანშეწონილად ჩათვალა, რომ დასმული საკითხების გამოკვლევა ჩაატაროს დამატებითი ნიმუშების აღება. ფრჩხილის და თმის ნიმუშებზე არ არის საუბარი, ექსპერტიზის ეროვნულ ბიუროს ვეყრდნობით ჩვენ, სისხლის ნიმუში უნდა ავიღოთ დამატებით. ვნახე ჯანმოსთან დაკავშირებით ადვოკატის განცხადება, ჯანმოს პროტოკოლთან დაკავშირებით, მე ახლა ამაზე კომენტარს ვერ გავაკეთებ”,- ამბობს ვასილ კაკაშვილი, სპეციალური საგამოძიებო სამსახურის წარმომადგენელი.
აღსანიშნავია, რომ მიხეილ სააკაშვილის უფლებადამცველი, შალვა ხაჭაპურიძე უკვე რამდენიმე დღეა იმეორებს, რომ ორგანიზმში მძიმე მეტალების აღმოჩენა ხდება თმისა და ფრჩხილის ნიმუშებით.
“მთელი მსოფლიო სტანდარტით, რაც არის მიღებული, მძიმე მეტალების აღმოჩენა ხდება თმით და ფრჩხილებით. როდესაც თავიდან გამოითქვა ეჭვი მაისის თვეში მაშინ გერმანიაში ჩატარდა ეს ანალიზი სისხლით და არ დადასტურდა. “ვივა მედმა” რომ ჩაატარა და მთელი ხარვეზი ის იყო, რომ სისხლში კი არ უნდა ჩატარებულიყო, უნდა ჩატარებულიყო თმებში”,- ამბობს შალვა ხაჭაპურიძე.
შეგახსენებთ, რომ 2 დეკემბერს გასაჯაროვდა ამერიკელი ექსპერტების მიერ მიხეილ სააკაშვილისთვის ჩატარებული კვლევის დასკვნა. ტოქსიკოლოგიურ დასკვნაში ნათქვამია, რომ მიხეილ სააკაშვილის ორგანიზმში დიდი რაოდენობით ვერცხლისწყალი და დარიშხანია აღმოჩენილი. დასკვნის ავტორი დევიდ სმიტი აღნიშნავს იმასაც, რომ ნივთიერებები მიხეილ სააკაშვილის ორგანიზმში ციხეში შესვლის შემდეგ მოხვდა.