დედაქალაქის მერი კახა კალაძე ამბობს, რომ შეიწყალებს თუ არა პრეზიდენტი მიხეილ სააკაშვილს ეს გადაწყვეტილება სალომე ზურაბიშვილზეა დამოკიდებული.
როგორც კალაძემ ჟურნალისტებთან საუბრისას აღნიშნა, “არავის სურს არა მხოლოდ მესამე პრეზიდენტის, არცერთი პატიმრის სიკვდილი”.
“ეს პრეზიდენტის გადასაწყვეტია, პრეზიდენტმა უნდა მიიღოს გადაწყვეტილება, თუმცა კიდევ ერთხელ ვიმეორებ, ადამიანს, რომელსაც მიუძღვის ბრალი და აქვს ჩადენილი დანაშაული კონკრეტულ საქმეებთან დაკავშირებით, ჩემი პოზიცია არის, რომ ყველამ უნდა აგოს პასუხი. ჩვენ გვაქვს ძალიან დიდი პასუხისმგებლობა და როცა ხარ პოლიტიკაში, ხარ პოლიტიკოსი და მით უმეტეს ქვეყნის პირველი პირი, ძალიან დიდი პასუხისმგებლობა გაქვს. არავის სურს არა მხოლოდ მესამე პრეზიდენტის, არცერთი პატიმრის სიკვდილი. ჯანმრთელობის უსაფრთხოება, როგორც მიხეილ სააკაშვილის შემთხვევაში, ყველა პატიმრის შემთხვევაში ძალიან მნიშვნელოვანია”, – თქვა კახა კალაძემ.
ცნობისთვის, მიხეილ სააკაშვილის პატიმრობასთან დაკავშირებით სალომე ზურაბიშვილმა BBC-თან ინტერვიუში ისაუბრა. ზურაბიშვილის თქმით, მას მიხეილ სააკაშვილის შეწყალების უფლება ჯერჯერობით არ აქვს, რადგან საქმეზე საბოლოო განაჩენი გამოტანილი არ არის, თუმცა იქვე აღნიშნა თავის პოზიციაც და თქვა, რომ მისი მხრიდან მიხეილ სააკაშვილის შეწყალება ქვეყანაში დამატებით პოლარიზაციას გამოიწვევს.