“ქართული ოცნება” ანტიკორუფციულ ბიუროს ქმნის

0
217

მმართველმა გუნდმა საჯარო სამართლის იურიდიული პირის – ანტიკორუფციული ბიუროს შექმნის გადაწყვეტილება მიიღო, რომლის ძირითადი ამოცანა კორუფციის წინააღმდეგ ბრძოლის ხელშეწყობა იქნება.

ანტიკორუფციული ბიურო ზედამხედველობას კორუფციის წინააღმდეგ ბრძოლის ზოგადი პოლიტიკის განმსაზღვრელი დოკუმენტისა და ეროვნული ანტიკორუფციული სტრატეგიის შესრულებას გაუწევს. აღნიშნული ბიურო ასევე კოორდინაციას გაუწევს სათანდო ორგანოების, ორგანიზაციებისა და თანამდებობის პირების საქმიანობას.

ანტიკორუფციული ბიურო ანგარიშვალდებული იქნება პარლამენტისა და უწყებათაშორისი ანტიკორუფციული საბჭოს წინაშე. კერძოდ, ბიუროს ხელმძღვანელი წლიურ ანგარიშს პარლამენტს წარუდგენს, ხოლო პერიოდულ ანგარიშებს წარუდგენს უწყებათაშორის ანტიკორუფციულ საბჭოს.

რაც შეეხება ანტიკორუფციული ბიუროს უფროსის თანამდებობაზე დანიშნას, “ქართული ოცნების“ მიერ შეთავაზებულია შემდეგი წესი: ანტიკორუფციული ბიუროს უფროსის კანდიდატურებს ღია კონკურსის საფუძველზე, სახელმწიფო უწყებებისა და სამოქალაქო საზოგადოების წარმომადგენლების მონაწილეობით შექმნილი საკონკურსო კომისია შეარჩევს და თანამდებობაზე დასანიშნად პრემიერ-მინისტრს წარუდგენს, ხოლო პრემიერ-მინისტრი წარდგენილი კანდიდატებისგან შეარჩევს და თანამდებობაზე დანიშნავს ანტიკორუფიული ბიუროს უფროსს.

“ჩვენს მიერ მომზადებული საკანონმდებლო ცვლილებები მთლიანობაში ევროკომისიის 12-პუნქტიანი გეგმის მე-4 პუნქტის შესრულებას და ევროკავშირის წევრობის კანდიდატის სტატუსის საქართველოსთვის მინიჭებას ემსახურება. საკანონმდებლო ცვლილებების პაკეტს დღეს ვაინიცირებთ. იურიდიულ საკითხთა კომიტეტი კანონის პროექტის განხილვას მომდევნო კვირიდან შეუდგება”, – განაცხადა პარლამენტის იურიდიულ საკითხთა კომიტეტის თავმჯდომარე ანრი ოხანაშვილმა.

წინა სტატიაოროსნების ლიდერი ვართ – ზურაბ ჯაფარიძე
შემდეგი სტატიაალიევმა რაღაც მესიჯები ჩამოიტანა, რაც არ უნდოდათ, რომ ზედმეტ ადამიანს გაეგო – პაატა ზაქარეიშვილი
ტელეკომპანია ოდიშის საინფორმაციო სამსახური