უკრაინის შეიარაღებული ძალების მიერ დაწყებული უნიკალური გარღვევა გრძელდება ხარკოვ-იზიუმის მიმართულებაზე. ამ დროისთვის ოფიციალურად დაუდასტურებელი, მაგრამ მებრძოლებთან და ცალკეულ კომპეტენტურ პირებთან გადამოწმებული ინფორმაციით, დადასტურებულად შეიძლება ითქვას, რომ ქალაქი კუპიანსკი უკრაინელთა მიერ კონტროლდება.
კუპიანსკი ხარკოვსა და იზიუმს შორის მდებარეობს და უმნიშვნელოვანეს, სტრატეგიულად ღირებულ ქალაქს წარმოადგენს რუსი ოკუპანტების იზიუმის დაჯგუფებისთვის. ამ ქალაქში ორი ავტომაგისტრალი და “კუპიანსკი-საკვანძო” – რკინიგზების ქსელი მდებარეობს. სხვათა შორის, სწორედ კუპიანსკი იყო ის ქალაქი, სადაც თეებვალში რუსი ოკუპნატები ყველაზე პირველად შევიდნენ.
სწორედ კუპიანსკში შესვლის შესახებ გავრცელებულ ცნობებს მოჰყვა ინფორმაცია იზიუმში უკრაინელთა შესვლის შესახებ. პირველი ცნობებით, იზიუმში უკრაინელები ღამით შევიდნენ და დივერსიულ-სადაზვერვო ჯგუფების მოქმედება მთელ ქალაქში გაშალეს – ამის შესახებ თავად რუსული რესურსები წერდნენ.
ჯერჯერობით არც კუპიანსკის, არც იზიუმის დაბრუნება ოფიციალურად არ დადასტურებულა. უკრაინის პრეზიდენტმა ტრადიციულ ვიდეომიმართვაში განაცხადა, რომ ხარკოვის ოლქში, საერთო ჯამში, 30 დასახლებული პუნქტია გათავისუფლებული.
ამავდროულად, დასტურდება (არაოფიციალურად) უკრაინის არმიის შეტევეითი ოპერაციები სამხრეთის მიმართულებაზეც: უკვე ცნობილია, რომ უკრაინელებმა დასახლება ლიმანი გაიარეს და ასევე, დონეცკის ოლქში სვიატოგორსკი აიღეს.
გავრცელებული ცნობებით, შეტაკებები გუშინ, გვიან ღამით, ხერსონის მიმართულებაზე, ქალაქიდან 10-15 კმ-ის დაშორებით მიმდინარეობდა.