ნიდერლანდები უკრაინას დამატებით, 80 მილიონ ევროზე მეტი ღირებულების დახმარებას გაუწევს. ამის შესახებ ქვეყნის თავდაცვისა და საგარეო საქმეთა მინისტრებმა კიევში ვიზიტისას გამართულ საერთო პრესკონფერენციაზე განაცხადეს.
დახმარების პაკეტი მოიცავს 65 მილიონი ევროს ღირებულების ინვესტიციას უკრაინაში. ასევე, დამატებით 10 მილიონი გამოიყოფა საომარი მოქმედებების ტერიტორიებზე განაღმვისა და ასაფეთქებელი მოწყობილობების განადგურებისთვის.
გარდა ამისა, 1 მილიონი ევრო მოხმარდება რუსული აგრესიის შედეგად განადგურებული ქალაქების რეკონსტრუქციას. კერძოდ, ხერსონის, ოდესისა და მიკოლაევის.
კიდევ 2,5 მილიონი ევრო გადაეცემა ევროპის რეკონსტრუქციისა და განვითარების ბანკს მაკროეკონომიკური რეფორმების ექსპერტიზის მიწოდებისთვის. ხოლო 2 მილიონი ევრო გაეროს ფონდში გადაირიცხება სექსუალური და გენდერული ძალადობის მსხვერპლთა მხარდასაჭერად.