სახალხო დამცველის კონსილიუმის წევრი, ექიმი გიორგი გრიგოლია ამბობს, რომ მესამე პრეზიდენტს ცილოვანი შიმშილი აქვს, რაც კუნთების ატროფიაში გამოიხატება.
როგორც მან აღნიშნა, იმ პირობებში, რომელშიც მიხეილ სააკაშვილი ახლა იმყოფება, განკურნება შეუძლებელია.
“საშიში მდგომარეობაა საკმაოდ, იმიტომ, რომ ლაბორატორიული მონაცემებითაც დადგინდა, რომ მას აქვს სერიოზული ცილოვანი შიმშილი, რაც გამოიხატება კუნთების ატროფიაში. ამ პირობებში, სადაც იმყოფება, მისი განკურნება არის შეუძლებელი, იმიტომ რომ არც ერთ ეტაპზე, არც ერთი ჩვენი დასკვნის შემდეგ რეკომენდაციები სრულყოფილად შესრულებული არ ყოფილა. აქედან გამომდინარე, თუ აქ მკურნალობა შეუძლებელია, ეს იმას ნიშნავს, რომ რა თქმა უნდა, უკეთესია გავაცილოთ აქაურობას”, – ამბობს გიორგი გრიგოლია.
ცნობისთვის, მიხეილ სააკაშვილის მონახულება დღეს ციხეში “ემპათიას” ექსპერტებს სურთ. მათი თქმით, უახლოესი საათების განმავლობაში შეიძლება შეუქცევადი მოვლენები განვითარდეს და სავალალო შედეგები მოჰყვეს.