რუსმა ოკუპანტებმა დღეს დილიდან რეზერვის შევსება და შეტევის ახალი მიმართულებების დამუშავება დაიწყეს. უკრაინის თავდაცვის გაერთიანებულ შტაბში ამბობენ, რომ სიტუაცია ყველა მიმართულებით მძიმდება, მაგრამ კონტროლს ექვემდებარება.
ბოლო ორი დღეა, გაჩნდა ახალი ცხელი წწერტილი – ეს კიევის ჩრდილო-დასავლეთია, რომელიც რუსი ოკუპანტების მიერ ახალ სამიზნედაა მიჩნეული. ამ ეტაპზე იქ შეტაკებები მიმდინარეობს.
უკვე მერამდენედ, მძიმე ღამე იყო ხარკოვში, რომელსაც რუსი ოკუპანტები განსაკუთრებული მონდომებით უტევენ. აქ ისინი უკრაინელთა მხრიდან განსაკუთრებულ წინააღმდეგობას წააწყდნენ, ამოეწურათ მარაგიც, თუმცა, ამ ეტაპზე ეს პრობლემა მოგვარებულია, შესაბამისად, ხარკოვს ისევ მძიმე ღამე და დღე ელის.
ხერსონს ისევ ოკუპანტები აკონტროლებენ, თუმცა, ამას ჯეროვნად ვერ ახერხებენ – მიზეზი მოსახლეობის მხრიდან მშვიდობიანი საპროტესტო აქციებია, სადაც ადგილობრივები ოკუპანტებს მოუწოდებენ, დატოვონ ქალაქი. ხერსონელებს უკრაინის პრეზიდენტმაც მიმართა: “აჩვენეთ მათ, რომ დროებით არიან ქალაქში, გამოდით ქუჩაში უკრაინის დროშით, იმღერეთ უკრაინის ჰიმნი”, – მოუწოდა ხერსონელებს ვოლოდიმირ ზელენსკიმ.
მძიმე რჩება ვითარება მარიუპოლში, რომელიც, ხარკოვისა და ოდესის მსგავსად, სტრატეგიული წერტილია. ქალაქი, ფაქტობრივად, ალყაშია, ადგილობრივებს დაუმთავრდათ საკვების მარაგი, დეფიციტია მედიკამენტების კუთხითაც. მარიუპოლზე გააფთრებული რუსული იერიში ისევ გრძელდება.