საქართველოს მესამე პრეზიდენტი უკვე მესამე დღეა, შიმშილობს. ექიმების შეფასებით, მიხეილ სააკაშვილის ჯანმრთელობის მდგომარეობა მძიმეა, რის გამოც შიმშილობამ შესაძლოა, ფატალური შედეგი გამოიღოს.
მედიკოსების თქმით, პირველ რიგში აუცილებელია, მესამე პრეზიდენტი ციხიდან სამედიცინო დაწესებულებაში გადაიყვანონ, სადაც შესაბამისი მკურნალობა გაეწევა.
“გართულდება მდგომარეობა. გართულდება იმიტომ, რომ პირველი შიმშილობისას მისი საწყისი მდგომარეობა სულ სხვანაირი იყო და ახლა სულ სხვანაირია. რა თქმა უნდა, ვეღარ იქნება საუბარი ხანგრძლივ შიმშილობაზე. თუ ჩვენ მართლა ვფიქრობთ მიხეილ სააკაშვილის ჯანმრთელობაზე, უკეთესი იქნება, რომ სადმე სხვაგან გადავიდეს. პირველ რიგში სტრესი მოეხსნება”, – ამბობს ანესთეზიოლოგ-რეანიმატოლოგი, გიორგი გრიგოლია.
მიხეილ სააკაშვილის სამედიცინო დაწესებულებაში გადაყვანის აუცილებლობაზე საუბრობს ალტერნატიული კონსილიუმის წევრი, ლალი ჯავაშვილიც. თუმცა, ის ფიქრობს, რომ უკეთესი იქნება, მესამე პრეზიდენტის მკურნალობა საზღვარგარეთ მოხდეს.
“ახალი შიმშილობა მისთვის ეს უკვე არის განაჩენი, ის ვეღარ გაუმკლავდება. მას აღარ გააჩნია საბაზისო სარეზერვო მექანიზმები, რომელიც გადაატანინებს მას თუნდაც 10-დღიან შიმშილობას. ეს ახალი გადაწყვეტილება შიმშილობისა, არის ფატალური შედეგის მომტანი ნამდვილად. ოპტიმალური გამოსავალია, რომ ის გადავიდეს, დათანხმდეს უცხოეთში გადაყვანას”, – თქვა ლალი ჯავაშვილმა.
ცნობისთვის, მიხეილ სააკაშვილი რუსთავის ციხეში საკვების მიღებაზე კვლავ უარს ამბობს. მესამე პრეზიდენტის მთავარი მოთხოვნა ადეკვატური სამედიცინო მომსახურების მიღებაა.