ზუგდიდის ახლადარეჩეულ საკრებულოში სხდომა ჩატარდა, თუმცა, საკრებულოს თავმჯდომარის არჩევა ვერ მოხერხდა, რადგან ენმ-ის ფრაქციამ კენჭისყრაში მონაწილეობა არ მიიღო და სხდომა პროტესტის ნიშნად დატოვა.
ეს უკვე მეორე შემთხვევაა, როცა საკრებულოს სხდომა ზუგდიდში ჩაიშალა.
ენმ აცხადებს, რომ ეს კრიზისის შექმნილია “ქართული ოცნების” მიერ. ასევე, ფრაქციის ლიდერის განმარტებით, მათთვის გაუგებარია კონსენსუსი ცალკეულ პოლიტიკურ სუბიექტებს შორის.
“ჩვენმა გუნდმა მიიღო გადაწყვეტილება დღეს კენჭისყრაში არ მიიღოს მონაწილეობა და დატოვოს დარბაზი. ეს არის ერთგვარი კრიზისის მოცემულობა და ეს კრიზისი ბუნებრივია, შეიქმნა არჩევნების შემდეგ ხელისუფლების მიერ და კონკრეტულად პოლიტიკური გუნდის “ქართული ოცნების” მიერ. კონკრეტულად არ მინდა პერსონიფიცირება, ეს ვისი და რის გამო მოხდა, ეს მოხდა მთლიანად სისტემის გამო, რომელმაც პირდაპირი გაგებით წაგვართვა მანდატი და ამან შეგვიყვანა ჩიხში”, – განაცხადა თემურ ბასილაიამ.
შეგახსენებთ, დღეს ასევე ვერ აირჩიეს თავმჯდომარეები სენაკში, ჩხოროწყუსა და ზუგდიდში, სადაც “გადამწყვეტი ხმა” გიორგი გახარიას პარტიას “საქართველოსთვის” ეკუთვნის. სხდომები ერთი კვირით გადაიდო.