ოქტომბერში საარსებო მინიმუმი წლიურად 36,5 ლარით გაიზარდა – საქსტატი

0
170

ოქტომბერში საარსებო მინიმუმი წლიურად 36,5 ლარით გაიზარდა და “შრომისუნარიანი მამაკაცის” არსებობისთვის საჭირო მინიმალური თანხის ოდენობა 224,2 ლარით განისაზღვრა. ინფორმაციას ამის შესახებ საქსტატი აქვეყნებს.

კვლევაში, ასევე, აღნიშნულია, რომ ოქტომბრის თვეში “საშუალო მომხმარებლის” საარსებო მინიმუმი წლიურად 32,3 ლარით არის გაზრდილი და 198,5 ლარს შეადგენს.

საარსებო მინიმუმის ამგვარი ზრდა ქვეყანაში არსებულ მაღალ ინფლაციას უკავშირდება. შეგახსენებთ, რომ ოქტომბერში წლიური ინფლაცია 12,8% იყო. ამასთან, იმავე თვეში წლიურ ინფლაციაზე ყველაზე დიდი გავლენა სურსათზე ფასების ზრდამ მოახდინა. როგორც ცნობილია, საარსებო მინიმუმის გაანგარიშებისას დიდი წილი სწორედ სურსათზე მოდის.

გარდა ამისა, აღსანიშნავია, რომ ოქტომბერში, მიმდინარე წლის წინა თვესთან შედარებით, არსებობისთვის საჭირო მინიმალური თანხის ოდენობა “შრომისუნარიანი მამაკაცისთვის” 7,9 ლარით, ხოლო “საშუალო მომხმარებლისთვის” 7 ლარით არის გაზრდილი.

საქსტატი საარსებო მინიმუმის მაჩვენებლებს 2004 წლიდან იმ მინიმალური სასურსათო კალათის მიხედვით ანგარიშობს, რომელიც განსაზღვრულია და დადგენილია “საკვებ ნივთიერებებსა და ენერგიაზე ორგანიზმის ფიზიოლოგიური მოთხოვნილებებისა და საარსებო მინიმუმის განსაზღვრისათვის საჭირო სასურსათო კალათის შემადგენლობის ნორმებისა და ნორმატივების დამტკიცების შესახებ” საქართველოს შრომის, ჯანმრთელობისა და სოციალური დაცვის მინისტრის ბრძანების შესაბამისად.

მინიმალური სასურსათო კალათა 40 დასახელების პროდუქტს მოიცავს. საარსებო მინიმუმის ღირებულებაში სასურსათო ხარჯების წილი 70%-ით, ხოლო არასასურსათო ხარჯების წილი 30%-ით განისაზღვრება.

წინა სტატია,,სასამართლოში ეტაპირების საფრთხე “თითიდან გამოწოვილი მიზეზია” – პეზიდენტ სააკაშვილის ადვოკატი
შემდეგი სტატიაუკრაინა განგაშის ზარებს არისხებს: ის, რაც საქართველოს მესამე პრეზიდენტთან მიმართებაში ხდება, წამებაა. ძალიან ვნერვიულობთ
ტელეკომპანია ოდიშის საინფორმაციო სამსახური