ენმ-ის სამეგრელოს რეგიონალური ორგანიზაციის ლიდერმა. პარლამენტის წევრმა ანა წითლიძემ პირველი კომენტარი გააკეთა მას შემდეგ, რაც პოლიციის შენობა დატოვა. მისი განცხადებით, ვერ მოისმინა განმარტება პოლიციისგან, რატომ დააკავეს პარლამენტის წევრი, რისი უფლებაც არ ჰქონდათ.
“ისინი ეძებდნენ ბლოკნოტს, რომელიც მე არ მქონდა და, შესაბამისად, ვერ იპოვეს”, – განაცხადა ანა წითლიძემ.
შეგახსენებთ, ზუგდიდის 21-ე საარჩევნო უბნიდან ანა წითლიძე და ენმ-ის დამკვირვებელი ხათუნა შამუგია პოლიციის განყოფილებაში მას შემდეგ გადაიყვანეს, რაც “ოცნების” კოორდინატორმა თინათინ კაკაჩიამ განაცხადა, რომ მისი პირადი ბლოკნოტი ჩანთიდან მოიპარეს, თუმცა, ადგილზე მყოფი სხვა დამკვირვებლების თქმით, კაკაჩია შეკეტილი იყო ოთახში სხვადასხვა ჩანთებთან ერთად და ის ბლოკნოტიც სწორედ იქ დარჩა, რის შემდეგაც ის მოქალაქემ ანა წითლიძეს მიაწოდა. ანა წითლიძემ ბლოკნოტი მედიის თანდასწრებით დაათვალიერა და იქ საჯარო მოხელეების, კომისიის წევრების, სხვადასხვა პირების საკონტაქტო სია და ასევე, პირადი ნომრები აღმოაჩინა.
დაგვაკავეს, რადგან კარუსელი არ დავუშვით – ანა წითლიძე პოლიციის განყოფილებაში გადაიყვანეს
პოლიციის განყოფილებიდან გამოსულმა ანა წითლიძემ განაცხადა, რომ იმ დროის განმავლობაში, რაც საარჩევნო უბნების დახურვამდე დარჩა, მმართველი პარტია და ადგილობრივი ხელისუფლება გეგმავს, უბნების უმრავლესობაში პროვოკაცია მოუწყონ ენმ-ისა და ოპოზიციის დამკვირვებლებს, რათა ისინი უბნებიდან გამოყარონ.
“მოვუწოდებ ჩვენს დამკვირვებლებს, იბრძოლონ ბოლომდე, არ წამოეგონ პროვოკაციას და არ დაუშვან ხმების გაყალბება”, – განაცხადა ანა წითლიძემ.