“ნაციონალური მოძრაობის” ზუგდიდის ოფისში დღეს სპეციალური ბრიფინგი გაიმართა, სადაც ჟურნალისტებს პარლამენტის წევრმა ანა წითლიძემ ვიდეოკადრები უჩვენა, სადაც როგორც წითლიძე ამბობს, ქართული ოცნების მხრიდან ოპოზიციურ ამომრჩევლებზე ზეწოლაა ასახული, კერძოდ, სახელისუფლებო პარტიის წარმომადგენლებმა, მაყვალა ანთიამ და ზუგდიდის თეატრის მსახიობმა მერაბ კაკალიამ, ოპოზიციის 30-მდე მხარდამჭერს პირადობის მოწმობები“ ნაციონალური მოძრაობის“ სახელით ჩამოართვეს.
ანა წითლიძე მოუწოდებს ოპოზიციის ამომრჩეველს, არ მისცენ პირადობის მოწმობები არავის, ასევე მოუწოდებს “ქართული ოცნების” შტაბს, შეწყვიტონ მსგავსი უკანონო ქმედებები, მათ შორის ადამიანების პირადი ტრაგედიით და პრობლემებით მანიპულირება, ასევე მოუწოდა პროკურატურას დაინტერესდეს საქმის დეტალებით და დაიწყოს გამოძიება.
ანა წითლიძე ამბობს, რომ მსგავსი შემთხვევების დამადასტურებელი ყველა მტკიცებულება აქვთ, რომელიც უკვე გადასცეს ეუთო ოდირის მისიას და საერთაშორისო დამკვირვებლებს .
“ქართული ოცნების”‘ ზუგდიდის შტაბში კი მედიას უთხრეს, რომ ბრიფინგზე გაჟრერებული ინფორმაცია არასწორია:
“მათ მიერ ნახსენები ადამიანები არ არიან არც ქართული ოცნების წევრები, მეტიც არ არიან ჩართული არც საშტაბო და არც სხვა რაიმე სახის საარჩევნო საქმიანობაში. პროვოკაციის ავტორი თავად ნაციონალური მოძრაობაა, რომელსაც ბელადისგან აქვს დავალება მიღებული რაც შეიძლება მეტი დაძაბულობა და პროვოკცია შექმნან ყველგან. თუმცა არ გამოსდით, რადგან მათი ხერხები ამომრჩევლისთვის ცნობილია.”- აცხადებენ შტაბში.