პარტია “საქართველოსთვის” ზუგდიდის ოფისში დღეს ხელისუფლების მხრიდან ზეწოლაზე მორიგი განცხადება გააკეთეს . პარტიის პოლიტსაბჭოს წევრის გიგა ფარულავას განცხადებით, პროპორციული სიის მე-19 ნომერმა გიორგი ჯოჯუამ, გუშინ საოლქო საარჩევნო კომისიას კანდიდატურის მოხსნის მოთხოვნით მიმართა. პარტიაში განმარტავენ, რომ მიზეზი მასზე ზეწოლაა. გიგა ფარულავას თქმით, “ქართულმა ოცნებამ” კანდიდატის დასაშინებლად უკიდერეს ფორმას მიმართა და პროვოკაციის მოწყობით მუქარა განახორციელა.
ფაქტს უარყოფენ „ქართული ოცნების“ შტაბში და ამბობენ, რომ აღნიშნულმა პირმა პოლიტიკურ საქმიანობაზე უარი ჯერ კიდევ 25 აგვისტოს სოციალურ ქსელში დააანონსა და მათთვის გაუგებარია, რატომ შეიყვანა ის გახარიას პარტიამ სიაში. „ოდიში“ გიორგი ჯოჯუას დაუკავშირდა, რომელმაც განაცხადა, რომ არანაირი ზეწოლა არ ყოფილა და ეს მხოლოდ მისი სურვილი იყო, რადგან არასამთავრობო ორგანიზაცია შექმნა და სხვა გეგმები აქვს. გიგა ფარულავას ინფორმაციით, ზეწოლის და მოსყიდვის ფაქტები დაფიქსირდა ფოთშიც, სადაც მათ მერობისა და მაჟორიტარობის კანდიდატებს საკმაოდ სოლიდური თანხა შესთავაზეს.
“საქართველოსთვის” კიდევ ერთმა წევრმა კანდიდატურა მოხსნა