მოძრაობა „სამეგრელოს ხმა“ დღეიდან ანალიტიკური კვლევითი ჯგუფი ხდება, რომელიც შეისწავლის რეგიონში არსებულ ეკოლოგიურ და სოციალურ პრობლემებს, რომლის გადაწყვეტის პროცესში აქტიურ მედიატორობას გასწევს ხელისუფლებასა და საზოგადოებას შორის . ამის შესახებ ჟურნალისტებს დღეს ორგანიზაციის დამფუძნებელმა თენგიზ ჯგუშიამ განუცხადა. მისივე თქმით, ამ ეტაპზე ჯგუფი ცემენტის ქარხნის საკითხზე მუშაობს, რომლის გარემოზე ზემოქმედების შეფასების დოკუმენტის საჯარო განხილვა შოთა მესხიას ზუგდიდის სახელმწიფო სასწავლო უნივერსიტეტში 25 აგვისტოს 17:00 საათზე მოეწყობა. შეხვედრაზე მონაწილეობას მიიღებენ გარემოს დაცვის, სოფლის მეურნეობის სამინისტროების წარმომადგენლები, არასამთავრობო ორგანიზაციები, ადგილობრივი ხელისუფლების წარმომადგენლები და ადამიანები, რომლებიც ამ თემით უშუალოდ არიან დაინტერესებული.
თენგიზ ჯგუშიას თქმით, პროკურატურას ცემენტის ქარხნის თემაზე ორი ძირითადი განცხადებით მიმართა, საუბარია ადგილობრივი ხელისუფლების პასუხისგებლობასა და ტერიტორიაზე, რომელიც სახელმწიფო საკუთრებას წარმოადგენდა იმ დროს, როცა ცემენტის ქარხნის უკანონო მშენებლობა დაიწყო.
თენგიზ ჯგუშია მოუწოდებს ადგილობრივ ხელისუფლებას, კერძოდ კი საკრებულოს თავმჯდომარეს და „ქართული ოცნების „ მერობის კანდიდატს, მამუკა წოწერიას, ჩაერთოს განხილვების პროცესში და გაითავისოს ყველა ის პასუხისმგებლობა, რაც ამ საქმესთან აკავშირებს, ასევე მოუწოდებს ყოფილ მერს გიორგი შენგელიას, აქტიურად ჩაერთოს განხილვის პროცესში.
შეგახსენებთ, რომ ზუგდიდში, ენგურქაღალდკომბინატის ტერიტორიაზე, სადაც ცემენტის ქარხნის მშენნებლობაა დაწყებული „სამეგრელოს ხმის „ ლიდერმა თენგიზ ჯგუშიამ მოსახლეობასთან ერთად გამაფრთხილებელი აქცია რამდენჯერმე ჩაატარა რამდენიმე თვის წინ. ქარხნის მშენებლობაზე ნებართვა გარემოსა და სოფლის მეურნეობის სამინისტროს მიერაა გაცემული, თუმცა, როგორც ჯგუშია ამბობს, აქ მითითებულია ფაიფურში, დემურიას ქუჩა, ქარხანა კი ჯანაშიას ქუჩაზე შენდება. მაშინ თენგიზ ჯგუშიამ ადგილობრივი ხელისუფლება მშენებლობის უკანონო ნებართვის გაცემაში დაადანაშულა, რაც მერიაში კატეგორიულად უარყვეს. ადგილობრივების თქმით, ცემენტის ქარხანა დასახლებულ პუნქტთან ახლოსაა და მის აშენებას არ დაუშვებენ. შეგახსენებთ, რომ ჯანაშიას ქუჩაზე ცემენტის ქარხანას კომპანია „ცემენტ კოლხეთი“ აშენებს.