შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი რუხის რესპუბლიკურ საავადმყოფოში აიცრა და ოკუპირებულ აფხაზეთში მცხოვრებ მოსახლეობას ვაქცინაციისკენ მოუწოდა. სახელმწიფო მინისტრი კორონავირუსის საწიმააღმდეგო ვაქცინა „სინოფარმით“ აიცრა. ოკუპირებული აფხაზეთიდან გადმოსული მოქალაქეებისთვის ვაქცინაცია რუხის რესპუბლიკურ საავადმყოფოში რეგისტრაციის გარეშეა ხელმისაწვდომი. კლინიკაში კორონავირუსის საწინააღმდეგო აცრის ჩატარება ქვეყანაში არსებული ოთხივე ვაქცინით არის შესაძლებელი.თეა ახვლედიანმა შიდა ქართლში ბორდერიზაციის შესახებ დასმულ შეკითხვასაც უპასუხა, მინისტრმა არც უარყო და არც დაადასტურა, რომ პროცესი აქტიურია და ახლაც მიმდინარეობს, მისივე თქმით, მსგავსი ფაქტი ყოველთვის ხდება მკაცრი რეაგირების საგანი და მას ქართული მხარე აუცილებლად დააყენებს ჟენევის საერთაშორისო მოლაპარაკებებზე.
ხურვალეთში რუსმა ოკუპანტებმა კიდევ ერთი ბანერი დადგეს, ამის შესახებ ინფორმაცია სოციალურ ქსელში გუშინ ანტისაოკუპაციო მოძრაობამ გაავრცელა, რომელსაც თან ახლავს ვიდეოც. „ბანერი ოკუპაციის ხაზის შიგნით, სამი დღის წინ დამონტაჟდა.“- წერს დავით ქაცარავა. სახელმწიფო უსაფრთხოების სამსახური ხურვალეთში მიმდინარე ბორდერიზაციის პროცესს ამ დრომდე არ გამოხმაურებია.