ზუგდიდის მე-6 საჯარო სკოლის დირექტორის, აწ გარდაცვლილი ია კერზაიას შვილი, ბაჩანა შენგელია აცხადებს, რომ დედამისის გარდაცვალების მაგალითი (ია კერზაიამ უარი თქვა წინასაარჩევნო აგიტაციაზე “ოცნების” სასარგებლოდ, რის შემდეგაც, ფსიქოლოგიური ზეწოლის შედეგად ნერვიულობის ფონზე, ინსულტი მიიღო და რამდენიმე დღეში გარდაიცვალა) ჭკუის სასწავლებელი არ აღმოჩნდა მმართველი პარტიისთვის.
განათლების რესურსსცენტრის ადგილობრივმა ხელმძღვანელობამ სკოლების არჩეული დირექტორებისთვის უფლებამოსილების ვადის გასვლის შემდეგ, 54-დან 24 სკოლაში “ქართულ ოცნებასთან” აფილირებული პირები დანიშნა და უფლებამოსილება მხოლოდ იმ პირებს გაუგრძელა, ვინც ხელისუფლების მიმართ ლოიალობაშია შემჩნეული.
რესურსცენტრში აცხადებენ, რომ სკოლების დირექტორები პოლიტიკური ნიშნით არ შერჩეულან და ეს მიდგომა არასწორია, ხოლო ოპოზიციური პარტიები ერთობლივ რეაგირებასა და საკითხის პარლამენტში დაყენებას აპირებენ. “ლელო საქართველოსთვის” სამეგრელოს ორგანიზაციის ლიდერის თამარ ბელქანიას განცხადებით, ოპოზიციურმა პარტიებმა დირექტორების დანიშვნაზე მორატორიუმი უნდა მოითხოვონ, რათა “ჩვენი შვილების ღირებული განათლება გადარჩეს”.