ჩანაწერები არ არსებობს, „მთავარის არხის“ მიერ გავრცელებული ინფორმაცია ფარულ მოსმენებთან დაკავშირებით, მორიგი „ფეიკ ნიუსია“ – ამის შესახებ არჩილ თალაკვაძემ განაცხადა, როცა ჟურნალისტებმა კომენტარი სთხოვეს “მთავარ აქცენტებში” გაჟღერებულ ფარულ ჩანაწერებზე.
“თქვენ გახსოვთ, რომ ნიკა გვარამიამ ერთ-ერთ ეთერში განაცხადა, რომ „რუსთავი 2“-ს და ჟურნალისტებს იყენებდა პოლიტიკური მიზნებისთვის და დღესაც არ არის გასაკვირი, რომ საარჩევნო პერიოდში პოლიტიკური მიზნებით ახდენს დეზინფორმაციის გავრცელებას, რომელსაც ყოველდღიურ რეჟიმში ჩვენ ვხედავთ. რაც ვნახეთ, ეს გახლავთ მორიგი „ფეიკ ნიუსი“, ვინაიდან სინამდვილეში ჩანაწერები არ არის. ეს არის ტექსტები, რომელიც ნებისმიერ ადამიანს შეუძლია დაწეროს. ნ.ჯ.-მ რა უთხრა ნ.კ.-ს და გ.ნ.-მ რა უთხრა ბ.ნ.-ს. ამის დაწერა შეუძლია ნებისმიერ ადამიანს ფურცელზე. თუმცა, არ უნდა გამოგვრჩეს ყურადღებიდან, რომ გადაცემა დაიწყო წინასწარი დაზღვევით, მან თქვა, მტკიცებულებებს და დეტალებს ნუ მომთხოვთ, რომ ეს მართლაც ხდებაო. როცა ასეთი განცხადებით იწყება ბრიფინგი, ეს ემსახურება სენსაციას”, – აღნიშნა არჩილ თალაკვაძემ.
შეგახსენებთ, მთავარი არხის გენდირექტორმა ნიკა გვარამიამ, საავტორო გადაცემაში “მთავარი აქცენტები” სახელმწიფო სპეცსამსახურების ხელმძღვანელები დაადანაშაულა პოლიტიკოსების, ჟურნალისტების, არასამთავრობო ორგანიზაციების წარმომადგენელთა მასობრივ მოსმენაში.
ნიკა გვარამიამ წაიკითხა ექსკლუზიურად მოპოვებული კრებსი, რომელიც უშიშროების თანამშრომლების მიერ, სავარაუდოდ, საგანგებოდ მზადდებოდა ბიძინა ივანიშვილისთვის.
გადაცემას გამოეხმაურა რამდენიმე არასამთავრობო ორგანიზაციის წარმომადგენელი და დაადასტურა, რომ საუბრის შინაარსი ნამდვილად ავთენტურია. კონკრეტულად, ჩანაწერს გამოეხმაურნენ გიორგი მშვენიერაძე, გურო იმნაძე და სხვები.
გადაცემის ლინკი იხილეთ აქ