იტალიის საკურორტო კუნძულ სარდინიაზე ტყის ხანძრები მძვინვარებს. ხმელთაშუა ზღვაში მდებარე ამ კუნძულის დასავლეთ ნაწილიდან ევაკუირებულია 1500-ზე მეტი ადამიანი.
შექმნილ ვითარებას უპრეცედენტო კატასტროფა უწოდა სარდინიის გუბერნატორმა კრისტიან სოლინასმა. მისი ინფორმაციით, ხანძარს უკვე მოცული აქვს დაახლოებით 20 000 ჰექტარი. ცეცხლის კერებს ჯერჯერობით უშედეგოდ ებრძვის ასეულობით მეხანძრე-მაშველი.
იტალიის საგარეო საქმეთა მინისტრმა ლუიჯი დი მაიომ ხანძრის ჩასაქრობად დახმარება სთხოვა ევროკავშირის ქვეყნებს. სააგენტო „ფრანს პრეს“-ის ინფორმაციით, იტალიას 2-2 სპეციალური თვითმფრინავი უკვე გაუგზავნეს საფრანგეთმა და საბერძნეთმა.