დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ქვეყანაში კორონავირუსის გავრცელების მაჩვენებელი უარესდება და შესაძლოა მძიმე მე-4 ტალღაში შევიდეთ. NCDC-ის ხელმძღვანელი მოსახლეობას რეკომენდაციების დაცვისკენ მოუწოდებს.
“25-26 ივლისიდან მაჩვენებლებმა ზესვლა დაიწყო, რაც ნიშნავს იმას, რომ ეპიდსიტუაცია ქვეყანაში უარესდება. ანუ, უფრო მეტი ინტენსივობით ცირკულირებს. ყველა უნდა ვიყოთ ძალიან ფრთხილად, რადგან რაც შეიძლება მეტი გადავავადოთ და შევაკავოთ მე-4 ტალღის ქვეყანაში განვითარება. ამისთვის უფრო მეტი ადამიანი უნდა აიცრას, უფრო გავაფართოვოთ ტესტირება და ადრეული გამოვლენა შესაბამისად, იზოლირება ინფიცირებული ადამიანების”, — განაცხადა გამყრელიძემ.
13 ივლისის მონაცემებით, საქართველოში კორონავირუსის 1 862 ახალი შემთხვევა დადასტურდა, გამოჯანმრთელდა 619, ხოლო გარდაიცვალა — 11 ადამიანი.
ჯანდაცვის მინისტრის მოადგილის, თამარ გაბუნიას განცხადებით, ბავშვებში კორონავირუსის ინფექციის გავრცელების მაღალი მაჩვენებელია. მისივე თქმით, კოვიდვითარება ქვეყანაში ძალიან მძიმეა და განსაკუთრებულ რისკებს აყენებს.
“გუშინდელი შემთხვევების რაოდენობა უკვე 1 800-ს შემთხვევას აღემატება. ეს გარკვეულწილად არის ჯამური მაჩვენებელი, თუმცა მაინც მიუთითებს ბოლო ორი კვირის განმავლობაში შემთხვევების განსაკუთრებით გააქტიურებაზე. აქვე მინდა აქცენტი გავაკეთო იმაზე, რომ გასული 2-3 დღის განმავლობაში პედიატრიული საწოლების დამატებით მობილიზება მოგვიხდა, რაც ბავშვებში ინფექციის გავრცელების მაღალ მაჩვენებელზე მიუთითებს”, — განაცხადა გაბუნიამ.
მინისტრის მოადგილის თქმი, თბილისში მობილიზებული 200-მდე პედიატრიული საწოლი, რომელიც ეპიდემიის მე-2, მე-3 ტალღის განმავლობაში პრაქტიკულად დაუტვირთავი იყო, უკვე გადატვირთულია.
“ჩვენ მოგვიხდა კიდევ დამატებით საწოლების მობილიზება პედიატრიული პაციენტებისთვის, რაც ნიშნავს იმას, რომ ინფექციის გავრცელების კუთხით რისკები იზრდება”, — აღნიშნა მან.