TV პირველის ოპერატორი, ლექსო ლაშქარავა საბურთალოს სასაფლაოზე, მამის გვერდით დაკრძალეს. სასაფლაომდე ის სამოქალაქო საზოგადოებამ, ჟურნალისტებმა, პოლიტიკოსებმა, სამოქალაქო აქტივისტებმა მიაცილეს.
ლექსო ლაშქარავა საკუთარი სახლიდან ტაშით გამოაცილეს, ოპერატორებმა მას საპატიო, დახრილი კამერების კორიდორი გაუკეთეს. ლაშქარავას ცხედარს გაბმული ტაშითა და სიგნალებით მიაცილებდნენ, მოქალაქეები პროცესს ტაშით უერთდებოდნენ აივნებიდანაც.
აღსანიშნავია ისიც, რომ ლაშქარავას ოჯახში მისასამძიმრებლად არ მისულა ხელისუფლების არცერთი წარმომადგენელი. ოჯახს თანადგომა მხოლოდ პრეზიდენტმა სალომე ზურაბიშვილმა გამოუცხადა.
ცნობისთვის, ლექსო ლაშქარავა 5 ივლისს ჰომოფობიური და ძალადობრივი ჯგუფების წარმომადგენლებმა სასტიკად სცემეს. მას რამდენიმე წუთის განმავლობაში არაერთი პირი ურტყამდა, ლაშქარავას სახის ძვლები ჰქონდა ჩამტვრეული და ოპერაცია დასჭირდა. 11 ივლისს დილით ის საკუთარ სახლში დედამ გარდაცვლილი ნახა.