ზუგდიდში მასმედიის წარმომადგენლების მხარდასაჭერი მდუმარე აქცია გაიმართა. აქციაში რეგიონში მოქმედი მედიასშუალებების წარმომადგენლები მონაწილეობდნენ.
აქციის მონაწილეებმა დაგმეს გუშინ თბილისში მასმედიაზე განხორციელებული ძალადობა. მათ ყველა დამნაშავის გამოვლენა და კანონის სრული სიმკაცრით დასჯა მოითხოვეს.
მედიის მხარდამჭერი აქციები საქართველოს სხვადასხვა ქალაქში ერთდროულად დაიგეგმა. რუსთაველის გამზირსა და მიმდებარე ტერიტორიებზე „თბილისი პრაიდის“ მოწინააღმდეგეებმა გუშინ ჟურნალისტებისა და ოპერატორების მიმართ აგრესიული ქმედებები განახორციელეს. ამ ეტაპზე არსებული ინფორმაციით, დაშავებულია 16 მედიასაშუალების 50-ზე მეტი წარმომადგენელი.
ნაწილი მძიმე დაზიანებებით საავადმყოფოშია გადაყვანილი. დაზიანებულია ტელევიზიების და ონლაინ გამოცემების ტექნიკა.
ტელერადიოკომპანია “ოდიშმა” გუშინ სპეციალური განცხადება გაავრცელა, სადაც აღნიშნულია, რომ შეშფოთებას გამოთქვამს ბოლო დროს მედიის წარმომადგენლებზე გახშირებული თავდასხმების გამო, სრულ მხარდაჭერას და თანადგომას უცხადებს კოლეგებს, ხოლო ხელისუფლებას მოუწოდებს, მიიღოს ყველა ზომა, რათა ქვეყანაში დაცული იყოს გამოხატვის თავისუფლება, ხოლო ჟურნალისტურ საქმიანობაში ხელისშეშლა დაისაჯოს კანონის მთელი სიმკაცრით.