საქართველოს პქარლამენტის თავმჯდომარე კახა კუჭავა 6 ივლისის სხდომის დაწყების წინ პარლამენტში გამოეხმაურა 5 ივლისის ძალადობას, რომელიც, ძირითადად, მედიის წარმომადგენლებისკენ იყო მიმართული. მისი თქ2მით, გაუგებარია, რა საერთო აქვს კაცობასთან იმას, რომ “ათი კაცი ერთს დასდევს”. კახა კუჭავას თქმით, რაც 5 ივლისს მოხდა, “სირცხვილი იყო და ჩვენს ქვეყანას არ ეკადრება”.

“საერთოდ, ჩვენს ქვეყანას, ჩვენ ყველას გვაერთიანებს სიყვარული და ჩვენი რელიგია, რომელიც მოგვიწოდებს მხოლოდ ერთმანეთის პატივისცემას. ის, რაც ჩვენ გუშინ ვიხილეთ, მით უმეტეს, რელიგიის სახელით განხორციელებული ქმედებები, უბრალოდ მიუღებელია. მართლა არ მესმის, 10-10 კაცი რომ ერთს დასდევს, ამას ან კაცობა ჰქვია, ან ვაჟკაცობაში თვლიან, ან ვისი სახელით აკეთებენ ამას“, – განაცხადა კახა კუჭავამ 6 ივლისს, პარლამენტის ბიუროს სხდომის დაწყების წინ. მისი თქმით, განსაკუთრებით მიუღებელია, როდესაც ძალადობა ხდება ჟურნალისტებზე, ოპერატორებზე, ადამიანებზე, რომლებიც სამსახურებრივ მოვალეობას ასრულებენ”, თქვა მან და დაამატა, რომ ყველა მოძალადე იდენტიფიცირებული და დასჯილი უნდა იყოს.

“ერთადერთი გამოსავალი და შემდეგი ნაბიჯი არის მკაცრი რეაგირება. იდენტიფიცირება ყველა იმ ადამიანის, ვინც ძალადობაში იღებდა მონაწილეობას. უნდა დაისაჯოს ყველა. სხვანაირად ჩვენ ვერ განვვითარდებით“, – განაცხადა კახა კუჭავამ.

შეგახსენებთ, გუშინ, 5 ივლისს, თბილისში, წინასწარ დაანონსებული “თბილისი პრაიდის” ფარგლებში ჩატარებული ღონისძიებების გაშუქებისას 53 ჟურნალისტი და ოპერატორი სიძულვილის ჯგუფების წარმომადგენელთა მხრიდან ძალადობის მსხვერპლი გახდა. დღეს რამდენიმე პირი ადმინისტრაციული წესით დააკავეს და სამდღიანი პატიმრობა მიუსაჯეს. სისხლის სამართლის საქმე ჟურნალისტურ საქმიანობაში ხელის შეშლისა ან/და ძალადობის მუხლით აღძრული არ არის.