სამი რელიგიური ჯგუფი ღირსების მარშის საწინააღმდეგო განცხადებას ავრცელებს და ხელისუფლებას მოუწოდებს, მარშის ჩატარებას ხელი შეუშალოს. ერთ-ერთი განცხადება მოგვიანებით წაიშალა.
მუსლიმთა სამმართველოს, ეზიდთა სასულიერო საბჭოსა და თბილისის დიდი სინაგოგის მიმართვებს წინ უძღოდა მართლმადიდებელი ეკლესიის საპატრიარქოს განცხადება, რომელმაც მარშის საწინააღმდეგო აქცია დააანონსა, სადაც ბავშვების მიყვანასაც აპირებს. ამასთან, სამივე რელიგიური ორგანიზაციის განცხადება საპატრიარქოს საზოგადოებასთან ურთიერთობის სამსახურის ფეისბუქგვერდზეც გადაზიარდა.
სრულიად საქართველოს მუსლიმთა სამმართველოს ჰომოფობიური განცხადება ამ დროისთვის აღარ იძებნება. როგორც სამმართველო წერდა, მსგავსი პრაიდები მიზნად ისახავს არა უფლებების დაცვას, არამედ “დაპირისპირების გაღვივებას”.
“ის რასაც გეგმავენ ე.წ. პრაიდის ორგანიზატორები შეუთავსებელია ჩვენი მორალისათვის და წინააღმდეგობაში მოდის ერთობლივი თანაცხოვრებით ჩამოყალიბებულ ფასეულობებთან. ჩვენ უზნეობას ზნეობად ვერ შევრაცხავთ და ვერც ამის მცდელობას შევეგუებით”, — აღნიშნული იყო გავრცელებულ ტექსტში
სოლიდარობის თემის განმარტებით, განცხადება მათი მიმართვის საფუძველზე წაიშალა:
“ჩვენი მხრიდან, მკაცრად იქნა დაგმობილი განცხადების შინაარსი და დაფიქსირდა პოზიცია, რომ მიუღებელია მუსლიმი თემის სახელით, მსგავსი, ძალადობის წამახალისებელი განცხადება კეთდებოდეს. […]
მიგვაჩნია, რომ ლგბტქ+ პრაიდის საკითხი არ ეხება მხოლოდ ერთ თემს, დღეს “პრაიდის” ღონისძიების უსაფრთხოდ და სრულფასოვნად ჩატარება გადამწყვეტია სამოქალაქო მშვიდობისა და სამოქალაქო ინტეგრაციისთვის”.
ეზიდთა სასულიერო საბჭოში აცხადებენ, რომ დაგეგმილი ღირსების მარში “შეუთავსებელია მათ მორალთან” და “უპირისპირდება ტრადიციაში განმტკიცებულ ღირებულებებს”. გარდა ამისა, განცხადებაში წერია, რომ პატივს სცემენ გამოხატვის თავისუფლებას და ემიჯნებიან ნებისმიერი სახის დევნასა და ძალადობას.
თბილისის დიდი სინაგოგა პირდაპირ მიმართავს ხელისუფლებას, რომ არ დაუშვას თბილისი პრაიდის მსვლელობის ჩატარება.
“მივმართავთ საერთშორისო ორგანიზაციებისა და დიპლომატიური კორპუსის წარმომადგენლებს, ამ ღონისძიების მხარდაჭერით ნუ გაუცრუებთ საქართველოს მოსახლეობას იმ დიდ იმედს, რაც საქართველოს დასავლურ ორიენტაციასთან არის დაკავშირებული”, — აღნიშნულია ტექსტში.