ფოთისა და ხობის მიტროპოლიტი, მეუფე გრიგოლი Tbilisi Pride-თან დაკავშირებით საპატრიარქოს განცხადებას გამოეხმაურა და აღნიშნა, რომ პრაიდის ჩატარება – არ გამართვა სახელმწიფომ უნდა გადაწყვიტოს.  მისივე თქმით, სახელმწიფომ უნდა აიღოს პასუხისმგებლობა, პასუხი მოსთხოვოს იმ პირებს, რომლებიც კანონს დაარღვევენ.

“მე გეტყვით იმავეს, რაც მითქვამს – ეკლესია სახელმწიფო ინსტიტუტების ფუნქციას თავის თავზე ვერ აიღებს. სამწუხაროდ, მოხდა ისე, არ ვიცი, ეს შემთხვევით თუ განგებ, რომ ეკლესია აღმოჩნდა სწორედ ამ მოცემულობაში, როდესაც ის ფუნქცია, რაც უნდა სახელმწიფომ განახორციელოს, ანუ, კანონის მიხედვით რაც არის ნებადართული, გააკონტროლოს, რატომღაც ეკლესიის გადასაწყვეტი გახდა, სინამდვილეში კი ეკლესია არ არის ამ ფუნქციით დატვირთული”. – ამბობს მიტროპოლიტი და აღნიშნავს, რომ მას არ მოსწონს პრაიდი, “მაგრამ ჩემი არმოწონება არაფერს ნიშნავს. ვიღაცას მე არ მოვწონვარ და ახლა რა ვქნათ, როგორ მოვიქცეთ?!”