ალერგოლოგ-იმუნოლოგის ბიძინა კულუმბეგოვის ინფორმაციით, საქართველომ ავსტრიისგან საჩუქრად 5 000 დოზა კორონავირუსის საწინააღმდეგო AstraZeneca-ს ვაქცინა მიიღო.
“ავსტრიამ გვაჩუქა 5 000 დოზა ასტრაზენეკას ვაქცინა. ვაქცინები რამდენი წუთის წინ ჩამოვიდა საქართველოში. მადლობა ჩვენს მეგობრებს”. – წერს კულუმბეგოვი.
2 ივლისს ჯანდაცვის მინისტრმა, ეკატერინე ტიკარაძემ თქვა, რომ ის პირები, ვინც კორონავირუსის საწინააღმდეგო AstraZeneca-ს ვაქცინა მე-10-დან მე-12 კვირამდე უნდა მიიღოს, აცრას უახლოეს დღეებში შეძლებენ. მინისტრის თქმით, ეს დოზები ქვეყანაში დონაციის გზით უნდა შემოვიდეს.
კორონავირუსის საწინააღმდეგო AstraZeneca-ს ვაქცინით მოქალაქეების აცრა შეფერხებით მიმდინარეობს. მოქალაქეებმა, რომლებიც AstraZeneca-ს ვაქცინის პირველი დოზით უკვე აიცრნენ, მეორე დაჯავშნილი დოზა ვერ მიიღეს, 21 ივნისს, ვაქცინაციამდე 1 დღით ადრე, მათ დაავადებათა კონტროლის ეროვნული ცენტრისგან შეტყობინება მიიღეს, რომ ჯავშანი შეჩერებულია.