ზუგდიდის სპორტკომპლექსში დღეს პირველად, საკალათბურთო კემპი გაიმართა. კალათბურთელ გოგონათა მონაწილეობით დაიწყო პროექტი, რომლის ფარგლებშიც ჩატარდება ფართომასშტაბიანი კემპები და გამორჩეულ ახალგაზრდებს გზას ამერიკისა და ევროპისკენ გაუხსნის. ნატალია ოთხმეზურის სახელობის საკალათბურთო კემპის ორგანიზატორია საერთაშორისო სკაუტი ლაშა ფარღალავა, რომელიც ამერიკაში, კერძოდ ბრუკლინში მოღვაწეობს და სპეციალურად ჩამოვიდა საქართველოში, რომ ამ შეხვედრას ნატალია ოთხმეზურთან ერთად ზუგდიდში დასწრებოდა.ნატალია ოთხმეზური პირველი ქართველი კალათბურთელი გოგონაა, რომელიც საკალათბურთო კარიერას ამერიკაში განაგრძობს, . ახალგაზრდა კალათბურთელი „კასპერს კოლეჯის“ სრული სტიპენდიანტია. ქართულ ქალთა კალათბურთის ისტორიაში ეს არის პირველი შემთხვევა, როცა ამერიკული კოლეჯი ქართველი კალათბურთელით დაინტერესდა. ოთხმეზურის თქმით, საქართველოში ქალთა კალათბურთი არაა პოპულარული, შესაბამისად ხელშეყობაც ნაკლებადაა და განვითარების ნაკლები პერსპექტივაა, ამიტომაც მისი პოპულარიზაციისთვის ასეთი კემპების გამართვა, თანაც რეგიონებში, მნიშვნელოვანია.