შსს-ს ცენტრალური კრიმინალური სამმართველოს თანამშრომლებმა ყალბი დოკუმენტაციის დამზადების გზით მოქალაქეების უცხო ქვეყანაში უკანონოდ დარჩენის ორგანიზებისთვის ერთი პირი ბათუმში დააკავეს, მისი ოფისისა და ბინის ჩხრეკის შედეგად კი სხვადასხვა მოქალაქეზე გაცემული ავიაბილეთების, სასტუმროების ჯავშნები, გაყალბებული სამედიცინო კვლევები და საზღვარგარეთ გასამგზავრებლად საჭირო სხვა დოკუმენტაცია, ასევე, 2.500 ლარია ამოღებული.
„მას ბრალი ყალბი ოფიციალური დოკუმენტების გამოყენებითა და ფინანსური სარგებლის მიღების მიზნით საქართველოს მოქალაქეების უცხო ქვეყანაში წინასწარი შეცნობით უკანონოდ დარჩენის ორგანიზებასა და ხელშეწყობაში ედება.
დანაშაული 3-დან 6 წლამდე ვადით თავისუფლების აღკვეთას ითვალისწინებს.
გამოძიებამ დაადგინა, რომ ბრალდებულმა ს.კ.-მ საქართველოს ერთ-ერთ მოქალაქეს შესაბამისი პირობები შეუქმნა, კერძოდ, ყალბი დოკუმენტების მეშვეობით ორგანიზება გაუწია საზღვარგარეთ მის გამგზავრებას და უკანონოდ დარჩენას.
პოლიციამ, ს.კ.-ის საცხოვრებელი ბინისა და სამუშაო ოფისის ჩხრეკის შედეგად, ნივთმტკიცებად ამოიღო: სხვადასხვა მოქალაქის სახელზე გაცემული ავიბილეთების ჯავშნები, სასტუმროს ჯავშნები, სამედიცინო კვლევების გაყალბებული შედეგები, რეგისტრაციის ბარათები და საზღვარგარეთ გასამგზავრებლად საჭირო სხვა დოკუმენტები. დაკავებულის ოფისის ჩხრეკისას ასევე ამოღებულია 2500 ლარამდე თანხა“, – აღნიშნულია შსს-ს მიერ გავრცელებულ ინფორმაციაში.