შაორის ტბაში რამდენიმესაათიანი სამძებრო სამუშაოების შემდეგ მოზარდის ცხედარი იპოვეს.
არსებული ინფორმაციით, ბიჭი 14 წლისა იყო. უბედური შემთხვევის დროს ის ექსკურსიაზე იყო საჩხერის მუნიციპალიტეტის ერთ-ერთი სკოლის მოსწავლეებთან, მშობლებთან და მასწავლებლებთან ერთად. ბიჭი სურათის გადასაღებად შემაღლებულ ადგილზე ავიდა, სავარაუდოდ ქვაზე ფეხი დაუცურდა და წყალსი გადავარდა.
„დიდი ტრაგედია მოხდა ჩვენ რაიონში. ეს ბავშვი, კახაბერ ფარქოსაძე სოფელ ქობეთში ცხოვრობდა. როგორც ვიცი, ექსკურსიაზე იყვნენ წასულები რაჭაში. ჩემი ინფორმაციით, მისი მშობელიც იქ იყო. ამ დროისთვის გარდაცვლილის ცხედარი ქუთაისის პროზექტურაშია გადასვენებული”,- ამბობს საჩხერის მერი ბენიამენ ფალავანდიშვილი
“ამ ტრაგედიის თავიდან აცილება შეიძლებოდა თუ დავიცავდით დადგენილ რეგულაციებს” – ამბობს რესურსცენტრის წარმომადგენელი და ექსკურსიაზე პასუხისმგებლობას მშობლებს და პედაგოგებს აკისრებს. მისი თქმით, ირკვევა, რომ ქორეთის სკოლის მეცხრე კლასის მოსწავლეები ექსკურსიაზე ისე წავიდნენ, რომ განათლების სამინისტროს რეკომენდაცია გათვალისწინებული არ იყო.
რესურსცენტრის წარმომადგენლის ინფორმაციით, უკვე 2 წელია პანდემიიდან გამომდინარე დაწესებული შეზღუდვების ფარგლებში, განათლების სამინისტრომ რეკომენდაციები შეიმუშავა, რომლის მიხედვითაც, ექსკურსიები და მსგავსის სახის ხალხმრავალი შეკრებები არ უნდა ჩატარდეს.
მათივე ინფორმაციით, საქმის კურსში არ ჩაუყენებიათ არც ქორეთის სკოლის დირექტორი.