ან ცუდად გადღეგრძელეს, როცა დაიბადეთ, ან არასწორად დაიბადეთ ამ ქვეყანაზე -ლადო კახაძის მასტერკლასი დეპუტატებისათვის

0
55

რატომ ემსგავსებით ისეთ პოლიტიკოსებს, რომლებსაც ენის ჭკუაზე გინდათ სიარული, ტვინი არსებობს ამისთვის და ბოლოს და ბოლოს, 32 კბილი, –  გაკიცხა  დეპუტატები საპარლამენტო უმრავლესობის წევრმა ლადო კახაძემ საგაზაფხულო სესიის პლენარულ სხდომაზე

მისი თქმით,  „ენას კბილი უნდა დააჭირო“ იმ შემთხვევაში, როცა შესაძლოა, ქვეყნის საზიანოდ რამე წამოცდეს.

„ძალიან ხშირად იყენებთ სიტყვა „სადღეგრძელოს“, ასეთი შთაბეჭდილება მრჩება, რომ ისინი, ვინც ამას უგვანოდ იყენებთ, ცუდად გადღეგრძელეს, როცა დაიბადეთ, ან არასწორად დაიბადეთ ამ ქვეყანაზე და ვერ შეგეგებათ თქვენი წინამორბედი თქვენი მოვლენის გასახალისებლად და ამ სიხარულის გასანაწილებლად.

ადამიანებო, ამ სიტყვას დაუკვირდით, პოლიტიკოსების გამოსაყენებელი სიტყვა არ არის სადღეგრძელო, სადღეგრძელოს უკან ლიტერატურაც კარგად უნდა იცოდე, ისტორიაც, შენი საკუთარი ცოდნა მეცნიერების დარგის მიმართ, თუ გაქვთ ასეთი დარგი, არ ვიცი.

პოლიტიკოსები გახდით სულ ყველანი, არაფერი გამოგივლიათ ამ ქვეყანაზე, პირდაპირ ტრიბუნასთან დადექით. ეს გულს ტკენს ჩემს თაობას, რომელსაც დღე და ღამე აქვს ნამუშევარი, ყველაფერი აქვს გაკეთებული თავის ცხოვრებაში, რომ მოსულიყო და საჯარო სიტყვა ეთქვა.

დალოცვილიშვილებო, დედის ძუძუს რძე არ შეგრჩენიათ პირზე და ასეთ რამეს ლაპარაკობთ ტელევიიზიით, საჯარო სივრცეში, როგორ შეიძლება ეს. საჯარო სივრცეს გაუფრთხილდით, თქვენ თუ რაღაც დაგაკლოთ გამჩენმა, მათ მაინც გაუფრთხილდით.

პოლიტიკური ტრიბუნა ნიშნავს თანაზიარობას, გამოსწორებას, შექმნას. ერთი და იგივე სიბინძურეს ასე ადვილად რომ გადმოანთხევთ პირის ღრუდან. უნდა შეგეკითხოთ ახლა დარბაზში მონაწილეების დიდ ნაწილს და გითხრათ, ენა მეტყველების ორგანოა? დამიდასტურებთ, ჰო, მეტყველების ორგანოაო. არცერთი სწორი არ იქნებით, ვინც ამაზე თანახმა ხართ. ენა მეტყველების ორგანო კი არა, მეტყველებაში მონაწილე ორგანოა. ტვინის ნებას უნდა ასრულებდეს და ენის ჭკუაზე რომ ტვინმა იაროს, შეიძლება ეს?!  – განაცხადა კახაძემ.

წინა სტატიალიეტუვა საქართველოს ნატოს ოჯახის წევრად ხედავს – პრეზიდენტი გიტანას ნაუსედა
შემდეგი სტატიაბოლო მონაცემებით, 24 საათში 794 ახალი შემთხვევა დადასტურდა, გარდაიცვალა — 22 ადამიანი.
ტელეკომპანია ოდიშის საინფორმაციო სამსახური