სახალხო დამცველის განცხადებით, ის შეხვდა ნინოწმინდის საბავშვო პანსიონის ექვს აღსაზრდელს და, მისი თქმით, მათგან მიღებული ინფორმაცია და ძალადობრივი სცენების აღწერა, მინიმუმ, საყურადღებოა და, შესაძლოა, გამოძიების დაწყების საფუძვლად იქცეს.
“ექვსი ბავშვი ადასტურებს ფიზიკურ და ფსიქოლოგიურ ძალადობას, ასახელებენ 4-5 წლიდან 10 წლამდე პერიოდს, ჰყვებიან ძალადობის მეთოდებზე, მაგალითად, ცალ ფეხზე დგომა და სკამის დაჭერა ხელში, ასევე, მათი თქმით, აყურებინებდნენ, როგორ იკვებებოდნენ სხვები და თვითონ მათ არ აჭმევდნენ საჭმელს. ბავშვები ჰყვებიან, რომ იყო ფიზიკური შეხება როგორც ხელით, ასევე ჯოხებით, ასევე, ჰყვებიან, რომ გასული წლის დეკემბერში ჩარიცხულები აღრიცხულები არ არიან”,- აცხადებს სახალხო დამცველი ნინო ლომჯარია.
ამავე დროს, ამ წუთებში, მარჯანიშვილის მოედნის მიმდებარე ტერიტორიაზე მეუფე სპირიდონის მხარდამჭერი აქცია ტარედება, სადაც აცხადებენ, რომ სახალხო დამცველი ნინო ლომჯარია არღვევს ადამიანის უფლებებს და მოითხოვენ, ლომჯარია გადადგეს, ხოლო სახალხო დამცველის აპარატი საერთოდ გაუქმდეს.
აქციის მონაწილეები აპირებენ, სახალხო დამცველის ოფისთან გადაინაცვლონ და აქცია იქ გააგრძელონ.