დევნილებს, რომლებიც ოკუპირებული ტერიტორიებიდან გადმოვლენ, ვაქცინაციის პრობლემა არ შეექმნებათ, – ამის შესახებ დღეს ზუგდიდში დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორმა ამირან გამყრელიძემ ბრიფინგზე განაცხადა.
“ოკუპირებული ტერიტორიიდან გადმოსულები აცრის პუნქტებში დარეგისტრირდებიან, ვირტუალურ კაბინეტებში და მათ არ შეექმნებათ ვაქცინაციის პრობლემა”, – განაცხადა გამყრელიძემ.
მისივე თქმით, იმუნიზაციის ოთახების სამუშაო საათები გაიზრდება და ასევე შეიქმნება მობილური ჯგუფები, რომლებიც სახლებში მივლენ იმ ადამიანებთან ვისაც აქვს გადაადგილების პრობლემა, არიან ხანდაზმულები, მოხუცები, სშმ პირები და ვაქცინიზაციას ბინაზე ჩაატარებენ ანუ მათთვის, ვისაც გადაადგილება არ შეუძლია.
“ჩვენ ვმუშაობთ მობილურ ჯგუფებზეც, ვისაც არ შეუძლია მივიდეს აცრის კაბინეტამდე, მას მობილური ჯგუფი მოემსახურება სახლში და იქ გაუკეთებენ ვაქცინას”, – თქვა ჯანმრთელობის ეროვნული ცენტრის გენდირექტორმა.