ანტიოკუპაციურმა მოძრაობამ “ძალა ერთობაშია”, რომელიც შიდა ქართლის საოკუპაციო ზოლზე 2017 წლის ივლისიდან პატრულირებს, სოფელ ხურვალეთში წინასწარდაუგეგმავად ჩაშალა რუსი ოკუპანტების მასშტაბური სწავლების ერთი ეპიზოდი, რომელიც რადიოლოკაციურ საქმიანობას უკავშირდება.
მას შემდეგ, რაც დავით ქაცარავამ სამოქალაქო დრონი გამართა და ხურვალეთის თავზე, სასაფლაოსთან, იმ ტერიტორიას შემოუფრინა, სადაც ოკუპანტები აქტიურობდნენ, ამ უკანასკნელებმა იქაურობა დატოვეს, თუმცა მანამდე ევროკავშირის სადამკვირვებლო მისია გამოიძახეს.
დავით ქაცარავამ, დრონის მიერ გადაღებულ მასალაზე დაყრდნობით, ხურვალეთიდანვე დაწერა, რომ ოკუპანტები ახალი საგუშაგოს კეთილმოწყობით იყვნენ დაკავებული, მაგრამ ეს ასე არ აღმოჩნდა: დრონის მასალა რადიო “თავისუფლებამაც” შეისწავლა და აღმოაჩინა, რომ ოკუპანტების თავშეყრის მიზეზი სწორედ რადიოლოკაციური სწავლება იყო და არამხოლოდ “საგუშაგოს კეთილმოწყობა”.
“ხურვალეთში დრონით მონიტორინგის დროს დავაფიქსირეთ რუსორკების უცნაური მოქმედებები, რომლებიც პირველი შეხედვიდან მივიჩნიეთ მობილური საგუშაგოს მოწყობის მცდელობად. ხურვალეთიდან გამოსვლისას დავაფიქსირეთ ევროკავშირის მისიის მანქანების უპრეცენდენტოდ დიდი რაოდენობა, რამაც დაგვაფიქრა იმაზე, რომ საქმე ბევრად მნიშვნელოვან რამესთან გვქონდა, ვიდრე საგუშაგოს კეთილმოწყობის მოქმედებებთან.ასეც აღმოჩნდა. გუშინ ოკუპანტებს მასშტაბური წვრთნები ჰქონდათ გამართული კავშირგაბმულობის რადიოტრენინგის კუთხით, რაშიც ხურვალეთის მიმდებარედ ხელი შეეშალათ ჩვენი სამოქალაქო დრონის გამოჩენით. რაც ძალზედ საინტერესოა, სამოქალაქო დრონის გამოჩენა ჩათვალეს “ინციდენტად” და გამოიძახეს ევროკავშირის წარმომადგენლები. ჩვენმა ხელისუფლებამ კი იუხერხულა ეს “ინციდენტი” და კვლავ არაფერი შეიმჩნია…”, – წერს დავით ქაცარავა.