ჯანდაცვის მსოფლიო ორგანიზაციაში აცხადებენ, რომ ჩინური კორონავირუსის საწინააღმდეგო ვაქცინის, Sinovac-ის ავტორიზაციასთან დაკავშირებით – საბოლოო გადაწყვეტილებას შემდეგ კვირას, კონკრეტულად კი 1 ივნისს მიიღებენ.
ეს ის ვაქცინაა, რომლითაც საქართველოში ვაქცინაცია რამდენიმე დღის წინ, ჯერ კიდევ მსოფლიო ჯანდაცვის ორგანიზაციის ავტორიზაციამდე დაიწყო.
რამდენი თვის განმავლობაშია ეფექტური „სინოვაკით“ გამომუშავებული ანტისხეულები, ჯერჯერობით უცნობია, თუმცა ასეთი მონაცემები დაზუსტებით არც სხვა ვაქცინებზე არსებობს.
ჯანდაცვის მსოფლიო ორგანიზაციის მიერ ვაქცინის საგანგებო მოხმარებისთვის განთავსება (Emergency Use Listing) ნიშნავს, რომ ვაქცინის იმპორტის პროცესი მსოფლიოში უფრო სწრაფი იქნება. ამასთანავე, ჯანმოს მიერ ავტორიზირებული ვაქცინით აცრილები ევროკავშირის ქვეყნებში მოგზაურობას შეზღუდვების გარეშე შეძლებენ – მათ არ მოუწევთ ტესტის გაკეთება და კარანტინის გავლა. ეს საკითხს ევროკომისია განიხილავს.
„სინოვაკი“ აღიარების შემთხვევაში მეშვიდე ვაქცინა იქნება, რომელიც ჯანდაცვის მსოფლიო ორგანიზაციამ საგანგებო მოხმარებისთვის განათავსა – „სინოფარმთან“, Pfizer/BioNTech, Astrazeneca, Serum, Johnson & Johnson, Moderna-სთან ერთად