აშშ-ის პრეზიდენტი ჯო ბაიდენი საქართველოს დამოუკიდებლობის დღეს ულოცავს და პრემიერმინისტრისადმი გამოგზავნილ წერილში აღნიშნავს, რომ მისი ფიქრები “მიმართულია იმ ადამიანებისკენ, რომლებიც რუსეთის ოკუპაციის პირობებში ცხოვრობენ აფხაზეთსა და სამხრეთ ოსეთში”.
ამავე დროს, ჯო ბაიდენის გზავნილში ნათქვამია, რომ აშშ აღიარებს იმ გარე გამოწვევებს, რომლებთან გამკლავებასაც საქართველო აგრძელებს.
“შეერთებული შტატები საქართველოს ტერიტორიული მთლიანობის და სუვერენიტეტის მტკიცედ ერთგული რჩება საერთაშორისოდ აღიარებულ საზღვრებში. დამოუკიდებლობის დღესთან დაკავშირებით მიიღეთ ჩემგან საუკეთესო სურვილები პირადად თქვენ და ქართველმა ხალხმა”, – წერს ჯო ბაიდენი საქართველოს პრემიერმინისტრ ირაკლი ღარიბაშვილისადმი გაგზავნილ წერილში.
ამავე დროს, ჯო ბაიდენის წერილში ხაზგასმული და გამოხატულია იმედი, რომ საქართველოში სასამართლოს რეფორმა და დემოკრატიის განვითარება შეუქცევადი პროცესი იქნება:
“შეერთებული შტატები გააგრძელებს ქართველი ხალხის მხარდაჭერას მეტად დემოკრატიული და ეკონომიკური განვითარების გზაზე, რაც დამოუკიდებელი სასამართლოს და ინკლუზიური დემოკრატიული პროცესების გაძლიერებასაც გულისხმობს“, – წერს აშშ-ის პრეზიდენტი ჯო ბაიდენი.