ზემო ალვანელი მწყემსი, 49 წლის შოთა ლეკაიძე, რომელიც დღეს ფშაველი-აბანო-ომალოს გზის 47-ე კმ-ზე, სიმაღლიდან გადავარდა, კონტაქტურია და ტრავმატოლოგიური პროცედურები უტარდება – აცხადებს თელავის რეფერალური საავადმყოფოს მორიგე ექიმი.
ხევში გადაჩეხილმა მწყემსმა თავის ქალის მოტეხილობა და გულმკერდის დაზიანება მოტეხილობით მაშინ მიიღო, როცა მთაში, ცხვრის ფარის ჩამოსარეკად იყო წასული. ის მარტო არ ყოფილა, თუმცა, მეგობარი მწყემსი ჰყვება, რომ როცა შოთა ლეკაიძე დაცურდა, მისი შველა კი ვერ მოასწრო:
“პატარა ზვავი ჩამოწვა და ზვავზე დაუცდა ფეხი, დაცურდა, წონასწორობას ინარჩუნებდა წაქცეულიც, ერთი 30 მეტრი იცურა თოვლში და მერე ვეღარ შეძლო თავის შემაგრება, სიმაღლიდან გადავარდა”, – ჰყვება ზაქრო რაიბული.
მას შემდეგ, რაც ლეკაიძე ხევში გადაიჩეხა, ზაქრო რაიბული სასწრაფოდ სოფელ ფშაველში ჩავიდა, მომხდარის შესახებ სამაშველო სამსახურსა და ადგილობრივებს შეატყობინა, ხოლო ცოტა ხანში ხევში გადაჩეხილი მწყემსი მაშველებმა ამოიყვანეს და თელავის კლინიკაში გადაიყვანეს.