უკვე ცნობილია პირველი მოქმედება, რომელსაც რიონის ხეობის მცველები მას შემდეგ მიმართავენ, რაც “თბილისის პარალიზება” დაანონსეს.
შეგახსენებთ, რიონის ხეობის მცველებმა და ნამახვანჰესის მოწინააღმდეგეებმა, რომლებმაც პირველი რესპუბლიკის სახელობის მოედანზე მოიყარეს თავი და კარვები გაშალეს, ხელისუფლებას კი ულტიმატუმი წაუყენეს, მათ ვადა 12:00 საათამდე მისცეს, თუმცა, რეალურად, პირველი მსვლელობის მარშრუტის მიმართულება მხოლოდ ულტიმატუმის გასვლიდან ოთხი საათის შემდეგ დაასახელეს.
“4 საათზე დავიწყებთ მსვლელობას, “რედისონის” გავლით, თაბუკაშვილის ქუჩით, მშრალი ხიდის მიმართულებით, წინ გაგვიძღვება ერთი მანქანა, რომელზეც დამონტაჟებული იქნება შესაბამისი აპარატურა რომ კომუნიკაცია დავამყაროთ ერთმანეთთან”, – განაცხადა აქციის ერთერთმა ორგანიზატორმა ვარლამ გოლეთიანმა.
მისი თქმით, სწორედ მშრალ ხიდზე გაჩერდებიან და აქციის მონაწილეებს ორგანიზატორები სიტყვით მიმართავენ.
შეგახსენებთ, აქციის მონაწილეები ნამახვანჰესის მშენებლობას აპროტესტებენ და აცხადებენ, რომ არ დაუშვებენ 105 მეტრიანი სიმაღლის კაშხლის მშენებლობას, რომელიც 500-ზე მეტ ჰექტარს წყლით დაფარავს.
სპეციალისტების თქმით, ჰესის აშენების შემდეგ, რომელიმე ჯებირის დაზიანების შემთხვევაში, წყალს 19 წუთი დასჭირდება იმისთვის, რომ ქუთაისს მიაღწიოს. ექსპერტების გათვლით, ისტორიულ ქალაქს 34 მეტრის სიმაღლის ტალღა დაარტყამს.
23 მაისს, აქციის მონაწილეებმა თბილისში გადმოინაცვლეს და ხელისუფლებას დედაქალაქის პარალიზებით დაემუქრნენ.