საკოორდინაციო საბჭოს გადაწყვეტილებით, მიმდინარე კვირიდან, კომენდანტის საათის შემცირების კვალდაკვალ, რეგულაციების შემსუბუქება კვების ობიექტებსაც შეეხება: მაგალითად, რესტორნებს ღია სივრცეში კლიენტების მომსახურება უკვე შაბათ-კვირასაც შეეძლებათ.

დედაქალაქში მუნიციპალური ტრანსპორტი 17 მაისიდან უკვე 23:00 საათამდე იმუშავებს, ხოლო მგზავრობისას ისევ აუცილებელი იქნება პირბადის გამოყენება, საღამოობით კი მუნიციპალურ ტრანსპორტს ისევ სპეციალური სადეზინფექციო ხსნარებით დაამუშავებენ.

რაც შეეხება გადაადგილების უფლებას, იმ პირებს, ვისაც საშვები ჰქონდათ, კომენდანტის საათის მოქმედების ახალი პერიოდის მიუხედავად, საშვები უნარჩუნდებათ.

გიორგი ღიბრაძის თქმით, ვითარებაზე კონტროლი გაგრძელდება:

“ჩვენ განვაგრძობთ ეპიდემიოლოგიურ ტენდენციაზე დაკვირვებას და ვითარების სტაბილიზაციის შემთხვევაში, პირველი ივნისიდან, ამ მიმართულებით, შესაძლოა, შემდგომი შემსუბუქებაც დაიშვას,“- განაცხადა საკოორდინაციო საბჭოსთან არსებული სპეციალური შტაბის უფროსმა გიორგი ღიბრაძემ.

მისივე თქმით, კომენდანტის საათის დაწყების ახალი დროის ამოქმედება ითვალისწინებს რეგულაციის ადმინისტრირების აღსრულების სიმკაცრესაც, რაც იმას ნიშნავს, რომ გადაადგილების შეზღუდვაზე კონტროლი ზუსტად 23:00 საათიდან დაიწყება. 

ამასთან, დაავადებათა კონტროლის ცენტრის ხელმძღვანელმა ამირან გამყრელიძემ დღეს განაცხადა, რომ სრული შემსუბუქება, ჯერჯერობით, დაუშვებელია, თუმცა, მისივე თქმით, პიკი უკვე თითქმის გადალახულია და “დაღმავალ ფერდზე გავდივართ”.

საზოგადოებრივი ინტერესის მიუხედავად, საკოორდინაციო საბჭოზე დღეს არ უმსჯელიათ სახმელეთო საზღვრების შესაძლო გახსნის საკითხზე. 

შეგახსენებთ, ამ დრომდე, კომენდანტის საათი ქვეყნის მასშტაბით, 21:00-05:00 პერიოდში მოქმედებდა.