ქართული ოცნებისა და ოპოზიციური პარტიების წარმომადგენლების შეხვედრა 3 საათით გადაიდო, მიზეზი უცნობია. ევროკავშირის წარმომადგენლობის ინფორმაციით, 14:00 საათზე დაგეგმილი შეხვედრა 17:00 საათზე გაიმართება.

პარტიები ერთმანეთს საქართველოში ევროკავშირის წარმომადგენლობის ოფისში შეხვდებიან და სავარაუდოდ, შარლ მიშელის ეგიდით შექმნილ დოკუმენტზე იმსჯელებენ. ცნობილია, რომ შეხვედრას ევროკავშირისა და ამერიკის ელჩები დაესწრებიან და ევროპული საბჭოს პრეზიდენტის წარმომადგენელი, კრისტიან დანიელსონი საქართველოში არ ჩამოსულა.

ეს არის პირველი შეხვედრა მას შემდეგ, რაც 16 აპრილს ცნობილი გახდა, რომ მმართველი პარტია დოკუმენტს  ხელს აწერს.როგორც არჩილ თალაკვაძემ განაცხადა,  ქართული ოცნება მზად არის, 40%-იანი მხარდაჭერის პრინციპი გამოიყენოს, რაც იმას ნიშნავს, რომ, თუ მმართველი პარტია თვითმმართველობის არჩევნებში 40%-ს ვერ მიიღებს, ისინი ოპოზიციის მოთხოვნებს რიგგარეშე არჩევნებთან დაკავშირებით განიხილავენ. ოპოზიციაში კი აცხადებენ, რომ შეთანხმება მიღწეული იქნება მხოლოდ მას შემდეგ, რაც გადაწყდება ვადამდელი არჩევნებისა და პოლიტპატიმრების საკითხი.

ქართული ოცნების მიერ დოკუმენტზე ხელმოწერას წინ უძღოდა პარტიის თავმჯდომარის, ირაკლი კობახიძის ამერიკის შეერთებულ შტატებში ვიზიტი. კობახიძის განცხადებით, აშშ-ში შეხვედრებისას პარტნიორები მიანიშნებენ, რომ მათ, როგორც მმართველმა პარტიამ კრიზისის გადასაჭრელად ნაბიჯები უნდა გადადგან.