ტელეკომპანია ფორმულას ინფორმაციით, მათ თანამშრომლებს თავს დაესხნენ და მათზე ფიზიკურად იძალადეს. ერთ-ერთ მათგანს მძღოლს, ფიზიკურად გაუსწორდნენ, მეორეს კი მანქანა დაუმტვრიეს. მძღოლის თქმით, თავდამსხმელები სიტყვიერ შეურაცხყოფას აყენებდნენ და ახსენებდნენ ფორმულას. კიდევ ერთი თანამშრომელი კი მბობს,რომ მანქანაზე მინები, სავარაუდოდ, საქარე მინაზე ფორმულას საშვის ქონის გამო ჩაუმსხვრიეს.
მომხდარს ეხმაურებიან ოპოზიციაში.
პოლიტიკური მოძრაობა ,,დროას” ლიდერი, ელენე ხოშტარია ამბობს, რომ მსგავსი თავდასხმების მიზეზი ხელისუფლების მაღალჩინოსნების მიერ სიძულვილის ენის გამოყენებაა.
“საგანგაშო და უკიდურესად სახიფათოა კრიტიკული მედიის წარმომადგენლებზე ფიზიკური ძალადობა. ტელეკომპანია ფორმულას მძღოლებზე სხვადასხვა ადგილას განხორციელებული თავდასხმა ვერ იქნება და არ არის რიგითი კონფლიქტი. ეს არის მიზანმიმართული იერიში კრიტიკულ აზრის დახშობის მიზნით. ხელისუფლების მაღალჩინოსნების მიერ სიძულვილის ენის გამოყენება და გამუდგებული თავდასხმა მედიის წარმომადგენლებზე, ახალისებს მსგავს თავდასხმებს.
ჩვენ არ შევეგუებით განსხვავებული აზრის დევნას, კრიტიკული მედიის გაჩუმების მცდელობას და მათზე ძალადობას. სრული მხარდაჭერა ტელეკომპანია ფორმულას, მის ყველა თანამშრომელს და კრიტიკულ, დამოუკიდებელ ჟურნალისტებს”, – ამბობს ხოშტარია.
პარლამენტის თავმჯდომარის, არჩილ თალაკვაძის განცხადებით, ქართული ოცნების ხელისუფლების პერიოდში ჟურნალისტებზე თავდასხმა მიუღებელია. მისი თქმით, ფორმულას თანამშრომლებზე თავდასხმაზე იქნება სათანადო რეაგირება.
“ვგმობთ ყველანაირ ძალადობას და თავდასხმას მედიაზე. ეს არის მიუღებელი და ამას გაეცემა სამართლებრივი პასუხი. ამ შემთხვევაში, რამდენადაც, ვიცი შესაბამისი რეაგირება არის უკვე საგამოძიებო სტრუქტურების მხრიდან და როგორც ვახო სანაიას შემთხვევაში, ახლაც დეტალები იქნება დადგენილი და სათანადო რეაგირება მოხდება”, — განუცხადა მან ჟურნალისტებს.