“სტრატეგია აღმაშენებლის” ლიდერის, გიორგი ვაშაძის განცხადებით, საქართველოში ერვოპული საბჭოს პრეზიდენტის პირადი წარმომადგენლის, კრისტიან დანიელსონის დარჩენა ნიშნავს, რომ ვერცერთი მხარე ვერ გაექცევა შეთანხმებას.

“დანიელსონის დარჩენა ნიშნავს, დიახ, რომ ჩემი აზრით, ვერცერთი მხარე ვერ გაექცევა შეთანხმებას და მე ხაზს გავუსვამ კიდევ ერთხელ, რომ ევროკავშირისთვის ერთია, რომ საქართველოს შიდა სტაბილიზაცია უნდა მოხდეს, ევროატლანტიკური ინტეგრაცია, მაგრამ შეგახსენებთ, ბატონი შარლ მიშელის ნათქვამს წინა ვიზიტზე, ახლო პერიოდში მოსალოდნელია გარკვეული პრობლემები რეგიონში, შესაბამისად, ევროკავშირისთვის ძალიან მნიშვნელოვანია რაც შეიძლება სწრაფად მოხერხდეს შიდა პოლიტიკური კრიზისის განმუხტვა”, – თქვა გიორგი ვაშაძემ.

ოპოზიციის ლიდერებთან შეხვედრის შემდეგ ცნობილი გახდა, რომ კრისტიან დანიელსონი შეეცდება საქართვეოში იმ დრომდე დარჩეს, სანამ შეთანხმება არ მოხდება.

შეგახსენებთ, რომ ოპოზიციური პარტიების ლიდერები ევროპული საბჭოს პრეზიდენტის პირად წარმომადგენელთა, კრისტიან დანიელსონს 15 მარტს შეხვდნენ. დანიელსონმა საქართველოში ვიზიტი სწორედ დღევანდელი შეხვედრიების გამო კიდევ ერთი დღით გაახანგრძლივა.