ნაციონალური მოძრაობის წევრი ხატია დეკანოიძე აცხადებს, რომ ისტორია იმახსოვრებს სამარცხვინო ადამიანებს, ვინც არის მონობაში, მტრის სამსახურში, სწორედ ისე, როგორც ამას აღიქვამს საქართველოს მოსახლეობა. ეს არის, რა თქმა უნდა, პოლიტიკური გადაწყვეტილება და სასამართლოშიც იქნება პოლიტიკური გადაწყვეტილება, მაგრამ მივმართავ ყველა ადამიანს, რომელიც ფიქრობს, რომ აქ მხოლოდ გირაოშია საქმე – არა მეგობრებო! აქ არის საქმე თავისუფლებისთვის ბრძოლაში. ის, რომ ჩვენ არ ვაპირებთ, თავი დავუხაროთ გავრილოვს, ის, რომ აქ არ არის მხოლოდ ნიკაზე საუბარი, აქ საუბარია იმაზე, თუ რამდენად შეგვიძლია, შევინარჩუნოთ ჩვენი ღირსება და არ ვიყოთ მონობაში. თუ სასამართლო მიიღებს აღკვეთის ღონისძიების გატარების გადაწყვეტილებას, მე გულწრფელად შემიძლია გითხრათ, ჩვენ ვაპირებთ ჩვენი ღირსების, თავისუფლების, სუვერენიტეტის დაცვას.
ყველაზე უღირსი საქციელი, რაც კი შეიძლება ჩაიდინოს თავისუფალი ქვეყნის შვილმა, ეს არის ის, რომ ემსახუროს თავის დამპყრობელს და ამას აკეთებს დღეს ქართული ოცნება. გავრილოვის მონობა არის ყველაზე უღირსი საქციელი… მე არ ვაპირებ, გავრილოვს ვემსახურო, არც ჩემი მეგობრები და არც ის ღირსეული ადამიანი, რომელიც თვლის, რომ თავისუფლებისთვის ბრძოლა ყველაზე მნიშვნელოვანია.
ევროპული საქართველოს ერთ-ერთი ლიდერის, გიგი უგულავას განცხადებით, ეს ხელისუფლება “კანონიდან გავიდა” და სხვა გზას არ ტოვებს, ამიტომ თუ “საჩხუბრად” მივლენ, “ვისაც ძალა ერჩის, უნდა იჩხუბოს”. ასე ეხმაურება იგი ნაციონალური მოძრაობის თავმჯდომარის, ნიკა მელიასთვის იმუნიტეტის შეჩერების გადაწყვეტილებას.
“ძალიან ტყუილად ცდება იქ ბევრი, რომელიც თვლის, რომ “მე რაფერ შუაში ვარ, ხომ გესმით”. არა მეგობრებო, არავის არ ესმის თქვენი. ორპირობა, ორგულობა, ეს სიბინძურე და საზიზღრობა, რასაც ჩადიხართ, ისე არ იქნება, რომ “მერე რა მოხდა”. არა, ყველას მოგეკითხებათ. [შემდეგი ნაბიჯი] იქნება ის, რომ მოვლენ საჩხუბრად? ვისაც ძალა ერჩის, უნდა იჩხუბოს, სხვა გზას არ ტოვებს, კანონიდან გავიდა ეს ხელისუფლება, კონსტიტუციიდან, ჯანსაღი აზრის ფარგლებიდან გავიდა. პარლამენტში რომ მანქურთები არიან, მოსამართლეები უარესები არიან”, — განაცხადა მან.
ნაციონალური მოძრაობის ერთ-ერთი წევრის, გიორგი ბარამიძის განცხადებით, თუ პროკურატურა “ძალის გამოყენებით” დააპირებს პარტიის თავმჯდომარის, ნიკა მელიას დაკავებას, ისინი ამის საშუალებას არ მისცემენ. მისი თქმით, სპეცრაზმს, თუ ნებისმიერ სხვას, ოფისის “შტურმით” აღება მოუწევს. ასე ეხმაურება იგი მელიასთვის იმუნიტეტის შეჩერების შესახებ გადაწყვეტილებას.
“ნიკა მელიას ვერ დააკავებენ, კიდევ ერთხელ ვიმეორებ, ჩვენ მოველოდით ამ გადაწყვეტილებას, არა მარტო ნაციონალური მოძრაობის წევრები და მხარდამჭერები, არამედ სხვა პარტიის წევრები და რიგითი ადამიანები, რომელთაც განცდა გაუჩნდათ პროტესტისა გავრილოვის აქ ჩამოთრევასთან დაკავშირებით. ყველა დღესაც ხედავს, რომ ნიკა მელიას კი არ იჭერენ მარტო, პოტენციურად ყველა მათგანს, ვინცა აღშფოთდა გავრილოვის აქ ჩამოსვლის გამო.
აქედან გამომდინარე, ყველა, ვინც დააპირებს მოვიდეს აქ ნაციონალური მოძრაობის ოფისში, ცოცხალ-მკვდრად დავუდგეთ ნიკა მელიას წინ. თუ ისინი დააპირებენ, რომ ძალის გამოყენებით დააკავონ ნიკა მელია, დავუდგეთ წინ, რომ მათ ამის საშუალება არ მივცეთ. ამას გავაკეთებთ არა ძალადობრივი ფორმით, მშვიდობიანად. ოღონდ აქ იმდენი ხალხი იქნება და იმხელა წინააღმდეგობა იქნება მშვიდობიანი, მათ მოუწევთ, სპეცრაზმი იქნება, თუ რაც იქნება, ენმ-ს ოფისის შტურმი. რას გააკეთებენ, როგორ გააკეთებენ და ვის დაიჭერენ, ამას დავინახავთ”, — განაცხადა მან.
ქართულმა ოცნებამ პლენარულ სხდომაზე ნიკა მელიას იმუნიტეტი მეორედაც მოუხსნა, რითიც პროკურატურას ისევ მისცა მისი დაკავების უფლება. მმართველ გუნდში ამ განმარტებას არ იზიარებენ და ამბობენ, რომ მათ არა დაპატიმრების, არამედ პატიმრობის მოთხოვნის უფლება გასცეს და გადაწყვეტილება სასამართლომ უნდა მიიღოს.