საპროტესტო აქციების სერია, რომელიც დღეს იყო დაანონსებული, პარლამენტის მიმდებარე ტერიტორიაზე დაიწყო
აქციაზე შეკრებილმა მოქალაქეებმა შეზღუდვების შემსუბუქება და ეკონომიკის ამუშავება მოითხოვეს. ისინი სოლიდარობას უცხადებენ კორონავირუსის ეპიდემიის გამო დაწესებული შეზღუდვებით დაზარალებულ ბიზნეს-სექტორის წარმომადგენლებს.
აქციის მონაწილეების მთავარი მოთხოვნებია კომენდანტის საათის გაუქმება და ბიზნესისთვის მუშაობის უფლება, ასევე, სასწავლო და სახელოვნება სივრცეების გახსნა.
აქციის ორგანიზატორების ინფორმაციით, დღის განმავლობაში გაიმართება მუსიკალური პერფორმანსები, ანიმატორთა პროგრამა ბავშვებისთვის, გიდების საფეხმავლო ტური, ნაციონალური ცეკვების პროგრამა, ეროვნული ნაწარმისა და სუვენირების გამოფენა-გაყიდვა და ა.შ.
“ჩვენი პირველი მოთხოვნა არის ის, რომ აუცილებლად უნდა გაიხსნას ქვეყანა, მკაცრი რეგულაციებით, რა თქმა უნდა. პირველ რიგში იმიტომ, რომ ჩვენ, უკვე წელიწადი სრულდება, ვართ უმუშევრად დარჩენილი და ჩვენ ოჯახებში არიან ბავშვები, რომელ ბავშვებსაც კვება სჭირდებათ ელემენტარულად, სათამაშოს და შოკოლად რომ თავი დავანებოთ”, — განაცხადა აქციის ერთ-ერთმა მონაწილემ.
დღესვე, 20:00 საათზე პარლამენტთან კიდევ ერთი აქციაა დაგეგმილი.