ხელისუფლება მანდატებზე უარისმთქმელ ოპოზიციონერ დეპუტატებს აფრთხილებს, რომ თუ არ შეავსებენ ქონებრივ დეკლარაციას, 1 000-ლარიანი ჯარიმა დაეკისრებათ, ხოლო გადაუხდელობის შემთხვევაში, მათი სისხლის სამართლებრივი პასუხისმგებლობა დადგება.
ნაციონალური მოძრაობის ერთ-ერთი ლიდერის, ხატია დეკანოიძის განცხადებით, მისთვის წარმოუდგენელია შეავსოს დეკლარაცია მაშინ, როცა პარლამენტის ლეგიტიმაციას არ აღიარებს და საკუთარი მანდატის გაუქმებასაც მოითხოვს.
“ვინაიდან დაწერილი მაქვს განცხადება, არ ვავსებ არც დეკლარაციას. თორემ დასამალი არაფერი არა მაქვს საერთოდ, არც ქონებრივ დეკლარაციაში. ჩემი ქონებრივი დეკლარაცია შესწავლილი აქვს ყველას, მათ შორის, უკრაინაში, ძალიან დაწვრილებით. მაგრამ მე არ მინდა ამ პარლამენტის წევრობა, არ ვანიჭებ ლეგიტიმაციას მას. ამიტომ ახლა, სახელმწიფო იყენებს სისხლის სამართალს და კანონს, რომ მე დამსაჯოს იმის გამო, რაც არ მინდა. ასეთი რაღაც უბრალოდ არსად გამიგია”, — ამბობს ის.
დეკანოიძე არ გამორიცხავს, რომ მათ ნამდვილად დაეკისროთ 1 000-ლარიანი ჯარიმები და შემდეგ სისხლის სამართლებრივი დევნაც განხორციელდეს. როგორც ის აცხადებს, სანქციებს აუცილებლად გაასაჩივრებს.
“აბა, ეს სად წერია საერთოდ? წარმოუდგენელი რაღაც არის, რომ მე ვამბობ, არა, არ მსურს პარლამენტის წევრობა, უფლებამოსილება შემიწყვიტეთ, იმიტომ, რომ გაყალბდა არჩევნები და სახელმწიფო მეუბნება, შენ თუ არ გაივლი ყველა პროცედურას, რომელიც აუცილებელია, რომ პარლამენტის წევრმა გაიაროს, მაშინ დაგსჯი”, — თქვა მან.
გირჩი — მეტი თავისუფლების ლიდერმა, ზურაბ ჯაფარიძემ საკუთარ ფეუსბუქზე დაწერა, რომ შეტყობინება მასაც მიუვიდა.
ახლა მწერენ დეკლარაცია ჩაგვაბარე თორემ ჯერ 1,000 ლარს წაგართმევთ, მერე სისხლის სამართლის პასუხისგებაში მიგცემთ. ანუ, კობახიძე-თალაკვაძეებმა ჯერ გადაწყვიტეს რომ მათი ნებაა ვიქნები თუ არა პარლამენტის წევრი”რამე კიდევ დამავალეთ, ნუ გერიდებათ”, — მიმართავს ჯაფარიძე ქართულ ოცნებას.