გაეროს ბავშვთა ფონდის, „იუნისეფის“ მონაცემებით, საქართველოში 77 ათასი ბავშვი შიმშილობს, 300 ბავშვი ყოველწლიურად შიმშილით იღუპება. ჯიპების დაბურული და უკანანონოდ ნაშოვნი ფულით შეძენილი ფეშენელური სახლების პირად ბაღებში გამავალი ფანჯრებიდან ეს ალბათ ,,არ ჩანს”.
ყოველ შემთხვევაში, თუ სახლებში არა, საკუთარ სამყაროში ჩაკეტილი მოხელეები ამას ვერ ხედავენ.
“ხშირად არის საუბარი ბავშვთა შიმშილობაზე, მე დავაზუსტებ, რომ ეს არასწორი ტერმინია – ასეთი დეფინიცია არ არსებობს და არც რეალობას არ ასახავს.
უფრო სწორი იქნება, რომ ბავშვთა არასრულფასოვან კვებაზე ვისაუბროთ და ეს ნამდვილად პრობლემაა…”ამბობს ჯანდაცვის კომიტეტის თავმჯდომარე, დიმიტრი ხუნდაძე.
,,მე მაინც მითხარით, ამხელა გამოცდილება მაქვს და ამხელა ცხოვრება გამოვიარე, ამდენი ინფორმაცია მაქვს – ჩვენთან შიმშილით სიკვდილის შემთხვევა არსებობს თუ არა? და ერთი მაგალითი თუა, მითხარით.” – ერთპარტიულად შეკრებილ პარლამენტში ქართული ოცნების წევრმა, ლადო კახაძემ, ჯანდაცვის მინისტრს, ეკატერინე ტიკარაძეს, კითხვა დაუსვა.