„ევროპული საქართველოს“ ერთ-ერთი ლიდერის ელენე ხოშტარიას განცხადებით, ელისაშვილის პარლამენტში შესვლა მის „ქართულ ოცნებაში“ გაწევრიანებას ნიშნავს. მისი თქმით, სამწუხაროა ის ფაქტი, რომ მანამდე ელისაშვილმა მანამდე არჩევნების შედეგებს გაყალბებული უწოდა, ახლა კი მზად არის პარლამენტში შევიდეს:
“ალეკო და ლევანი რომ საუბრობენ, (საარჩევნო რეფორმაზე) რაღაც გამოვგლიჯეთო, ესეც ტყუილია. საარჩევნო რეფორმის გამოგლეჯა არ იყო გამოსავალი, ეს არ აგვარებს გაყალბებული არჩევნების პრობლემას, პოლიტიკური მძევლების გამოყვანის პრობლემას და კი არ განმუხტავს კრიზისს, ოცნებას უქმნის ლეგიტიმაციას.
როცა ადამიანებს მისცემ სიტყვას და მერე შეგიძლია, ეს სიტყვა გადათქვა, ეს არის პრობლემა. იმედი მაქვს, რომ ოპოზიციაში არ არის იმდენი მატყუარა პოლიტიკოსი, რომ კობახიძე ვერ შეძლებს ბინძური მეთოდებით ერთობის დაზიანებას და ცალკე აღებული ელისაშვილის პარლამენტში შესვლა არის არა ერთპარტიული პარლამენტის დასრულება, არამედ ალეკო ელისაშვილის ოცნებაში გაწევრიანება”. – განაცხადა ხოშტარიამ.
შეგახსენებთ, რომ დღეს ელისაშვილმა განაცხადა, რომ თუ ხელისუფლება საარჩევნო სისტემის რეფორმირებას მოახდენს, ის მზად არის პარლამენტში შევიდეს.