მოქალაქეების ლიდერის, ალეკო ელისაშვილის განცხადებით, ქართულმა ოცნებამ, როგორც, ჩანს, გააცნობიერა კრიზისის სიღრმე და “რაღაცებზე დაფიქრდა”/
,,დღეს პირველად ვნახე, რომ ქართული ოცნება რაღაცებზე დაფიქრდა, ეს ფაქტია. როგორც ჩანს, მათ გააცნობიერეს სიღრმე და მასშტაბი ამ კრიზისის. გააცნობიერეს, რომ სრული ქაოსი და საშინელი ზამთარი გველის. როგორც ჩანს, დაიწყეს რაღაც კონტურების მოხაზვა, რაც, ძალიან კარგია”, — განაცხადა პარტია “მოქალაქეების” ლიდერმა ალეკო ელისაშვილმა საქართველოში ამერიკის შეერთებული შტატების ელჩის კელი დეგნანის რეზიდენციის დატოვების შემდეგ.
ძალიან ნელა, წვალებით, რთულად, მაგრამ დღეს პოზიციები გაცილებით მეტადაა დაახლოებული, ვიდრე წინა დღეებში იყო. ხელისუფლება ოპოზიციისკენ აშკარად ნაბიჯებს დგამს. ტენდენცია პოზიტიურია, “ქართულმა ოცნებამ” გააცნობიერა კრიზისი, გააცნობიერა თუ როგორი ზამთარი გველის, გააცნობიერა პერსპექტივა იმის, რომ ერთპარტიული პარლამენტი როგორი სამარცხვინო შეიძლება იყოს. წითელი ხაზები ისევ არსებობს, მაგრამ უფრო წინ გადადგმული ნაბიჯებია. შესაბამისად, ოპტიმიზმი მომატებული მაქვს. ოპოზიციას ძალიან მცირე სივრცე აქვს კომპრომისისთვის, ნაბიჯები ხელისუფლებამ უნდა გადმოდგას და როგორც ჩანს, ამის მზაობაა. ფაქტია, რომ დღევანდელი დღე სამზადისია მესამე რაუნდისთვის, რომელიც ნაყოფიერად უნდა დასრულდეს. დღეს რა აზრთა გაცვლა-გამოცვლა იყო ძალიან მკაფიოა, რაც მისასალმებელია”, – განაცხადა ელისაშვილმა.