ზუგდიდის მუნიციპალიტეტის სოფელ ჯიხაშკარის სკოლაში მუშა დაზიანდა. როგორც ირკვევა, სკოლაში სარემონტო სამუშაოების დროს ახალგაზრდა მამაკაცს, რომელიც აქ იყო დასაქმებული, სამშენებლო მასალა (დესპე) დაეცა. მამაკაცს დაზიანება თავის არეში აქვს მიყენებული. ის გადაყვანილია ზუგდიდის რეფერალურ ჰოსპიტალში და ამ ეტაპზე უტარდება კვლევები :
“შემოყვანილია მამაკაცი, თავის არეში აქვს დაზიანება, უტარდება კვლევები და ვერ გეუბნებით ზუსტ პასუხს”- უთხრა “ოდიშინიუსს” საავადმყოფოს კლინიკურმა დირექტორმა სულხან ორჟონიამ.
ცნობისთვის ჯიხაშკარის მე-2 საჯარო სკოლაში სარემონტო სამუშაოებს მუნიციპალური განვითარების ფონდი ახორციელებს. ფონდში აცხდებენ, რომ მუშას მუშაობის დროს კასკა ეხურა,რომელმაც იგი დაზიანებისგან დაიცვა.”მკაცრად იცავენ უსაფრთხოების წესებს, გადაყვანილია რეფერალურ საავადმყოფოში, უტარდება კვლევები და მის სიცოცხლეს საფრთხე არ ემუქრება”,-ამბობენ მუნიციპალურ ფონდში.